
बैतडी । बैतडीको पाटन नगरपालिका–८ साँडीघाटीमा सोमबार बिहान भएको जिप दुर्घटनामा परी तीन जनाको घटनास्थलमै मृत्यु भएको छ। सुर्नया गाउँपालिका–६ मोतीनगरबाट डडेल्धुरातर्फ जाँदै गरेको म १ ज २२४ नम्बरको बोलेरो जिप बिहान साढे १० बजेतिर जय पृथ्वी राजमार्गमा दुर्घटनामा परेको हो।
जिल्ला प्रहरी कार्यालय बैतडीका प्रवक्ता, प्रहरी निरीक्षक सुरज सिंहका अनुसार जिप अनियन्त्रित भई सडकबाट करिब ३ सय मिटर तल खसेको छ। दुर्घटनामा परी ज्यान गुमाउने ३ जनाको हालसम्म सनाखत हुन सकेको छैन।
घाइतेहरूको उद्धार जारी
जिपमा सवार अन्य यात्रुहरू सबै घाइते भएका छन्। घाइतेहरूको सङ्ख्या अझै यकिन भइनसकेको र घटनास्थलमा प्रहरी तथा स्थानीयले उद्धार कार्य जारी राखेको प्रहरी निरीक्षक सिंहले जानकारी दिए। घटनाको थप विवरण आउन बाँकी छ भने प्रहरीले दुर्घटनाको कारणबारे अनुसन्धान सुरु गरेको जनाएको छ।

























