
विराटनगर । कोशी प्रदेशका पूर्व मुख्यमन्त्री तथा नेकपा एमालेका सचिव शेरधन राई पिता बनेका छन्। उनकी धर्मपत्नी जाङ्मु शेर्पाले सोमबार ललितपुरको भैँसेपाटीस्थित मेडिसिटी अस्पतालमा पहिलो सन्तानको रूपमा छोरालाई जन्म दिएकी हुन्। ५५ वर्षको उमेरमा पिता बनेका राईको सन्तानको प्रसूति चिकित्सकहरूले शल्यक्रिया (सिजरियन) मार्फत गराएका थिए।
सन्तान प्राप्तिको खुसी साट्दै नेता राईले २०८२ साल पुस २८ गते सोमबारको दिनलाई आफ्नो जीवनकै विशेष र अविस्मरणीय दिनका रूपमा चित्रण गरेका छन्। सामाजिक सञ्जालमार्फत आफ्नो खुसी बाँड्दै उनले लेखेका छन्, ‘हाम्रो परिवारमा पहिलो सन्तानको रूपमा छोराको आगमन भएको छ। यो व्यक्तिगत र पारिवारिक खुसीसँगै मलाई देश, समाज र भावी पुस्ताप्रति अझ गहिरो जिम्मेवारीबोधका साथ काम गर्न प्रेरित गरेको छ।’
राईको परिवारमा पहिलो सन्तानको आगमन भएपछि यतिबेला उनी र उनको परिवारलाई बधाई दिनेहरूको ओइरो लागेको छ। उनका शुभेच्छुक, पार्टीका नेता–कार्यकर्ता तथा सर्वसाधारणले सामाजिक सञ्जालमार्फत शुभकामना व्यक्त गरिरहेका छन्। पूर्व मुख्यमन्त्री राईका मामली भाइ मिलन राईका अनुसार यो खुसीको खबरले राजनीतिक वृत्तमा समेत खुसीयाली छाएको छ। राईले यस सुखद अवसरमा शुभकामना दिने सबैप्रति हार्दिक आभार समेत व्यक्त गरेका छन्।

























