
काठमाडौं । नेपाल विद्युत प्राधिकरणको पोखरा वितरण केन्द्रमा रहेको तामाको तार बिक्री गरेर हिनामिना गरिएको प्रकरणमा अख्तियार दुरुपयोग अनुसन्धान आयोगले ४ जनाविरुद्ध भ्रष्टाचार मुद्दा दायर गरेको छ ।
आयोगले तत्कालीन केन्द्र प्रमुखसहित कर्मचारी र सुरक्षागार्डको मिलेमतोमा सार्वजनिक सम्पत्तिको दुरुपयोग भएको ठहर गर्दै मंगलबार विशेष अदालत काठमाडौंमा मुद्दा दर्ता गरेको हो । अख्तियारले पोखरा वितरण केन्द्रका तत्कालीन केन्द्र प्रमुख राजीवकुमार सिंह र तत्कालीन सहायक लेखा अधिकृत लोकप्रसाद काफ्लेविरुद्ध सार्वजनिक सम्पत्तिमा हानी–नोक्सानी पुर्याई भ्रष्टाचार गरेको अभियोग लगाएको छ ।
उनीहरूसँगै कान्तिपुर सेक्युरिटी सर्भिस प्रा.लि, काठमाडौंमा कार्यरत सुरक्षागार्ड रामकुमार पुर्जा र हेम शर्मा रिजाललाई पनि प्रतिवादी बनाइएको छ । आयोगका अनुसार प्रतिवादी चारै जनाविरुद्ध जनही १३ लाख ९३ हजार ६०३ रुपैयाँ बिगो मागदाबी गरिएको छ ।
अनुसन्धानबाट पोखरा वितरण केन्द्रमा रहेको करिब ९ सय मिटर तामाको तार आपसी मिलेमतोमा बाहिर बिक्री गरी प्राधिकरणलाई उक्त बराबरको आर्थिक क्षति पुर्याइएको निष्कर्ष निकालिएको छ । यो प्रकरणको सुरुआत पोखरा वितरण केन्द्रमा परेको उजुरीबाट भएको थियो ।
केन्द्रअन्तर्गत कोत्रे पोल प्लान्टमा रहेको स्टोरबाट तामाको तार हराएको भन्दै वितरण केन्द्रका स्टोर प्रमुखले कार्यालय प्रमुखसमक्ष निवेदन दिएका थिए । निवेदनमा स्टोरमा मौज्दात देखाइएको तार वास्तविक रूपमा नदेखिएको उल्लेख गरिएको थियो ।
उक्त विषयलाई गम्भीर रूपमा लिएर पोखरा वितरण केन्द्रले आन्तरिक छानबिन समिति समेत गठन गरेको थियो । तर, छानबिनकै क्रममा केन्द्र प्रमुखसहित सम्बन्धित कर्मचारी र सुरक्षागार्डको संलग्नतामा तामाको तार अवैध रूपमा बिक्री गरिएको तथ्य बाहिर आएको अख्तियारको ठहर छ ।
आयोगका अनुसार हराएको भनिएको तार व्यवस्थापकीय कमजोरीका कारण नभई योजनाबद्ध रूपमा बाहिर लगेर बिक्री गरिएको प्रमाण भेटिएको हो । अख्तियारले सार्वजनिक संस्थामा कार्यरत पदाधिकारीले आफ्नो जिम्मेवारी विपरीत गई प्राधिकरणको सम्पत्तिमा क्षति पुर्याएको भन्दै यसलाई गम्भीर भ्रष्टाचारको घटना मानेको छ ।
मुद्दा विशेष अदालतमा दर्ता भएसँगै अब अदालतबाट कानुनी परीक्षण हुने छ । यस घटनाले नेपाल विद्युत प्राधिकरणभित्रको भौतिक सम्पत्तिको सुरक्षा, आन्तरिक नियन्त्रण प्रणाली र कर्मचारी उत्तरदायित्वमाथि पुनः प्रश्न उठाएको छ।

























