
काठमाडौं । नेपालमा हाल पश्चिमी वायुको आंशिक प्रभाव कायमै रहेको छ । जसका कारण आज (बिहीबार) देशका अधिकांश भू–भागमा मौसम सामान्यतया सफा रहने मौसम पूर्वानुमान महाशाखाले जनाएको छ ।
कोशी र गण्डकी प्रदेशका उच्च पहाडी तथा हिमाली क्षेत्रमा आंशिक बादल देखिए पनि अन्य स्थानमा आकाश खुला रहनेछ । तराईका केही भू–भागमा भने बिहान र बेलुकी हुस्सु तथा कुहिरो लाग्ने सम्भावना रहेको छ ।
बिहीबार दिउँसो तराईका सीमित स्थानमा हुस्सु कायम रहन सक्नेछ भने पहाडी र हिमाली क्षेत्रमा आंशिक बादलबाहेक उल्लेखनीय मौसम प्रणाली सक्रिय हुने देखिँदैन । राति पनि तराईका केही भागमा हुस्सु लाग्ने र कोशी, गण्डकी, कर्णाली तथा सुदूरपश्चिमका उच्च पहाडी क्षेत्रमा आंशिक बदली रहने अनुमान गरिएको छ ।
तरm शुक्रबारदेखि मौसममा स्पष्ट परिवर्तन देखिने पूर्वानुमान गरिएको छ । महाशाखाका अनुसार लुम्बिनी, कर्णाली र सुदूरपश्चिम प्रदेशका केही स्थानमा तथा गण्डकी प्रदेशका थोरै स्थानमा शुक्रबार मध्यम वर्षा हुन सक्ने सम्भावना छ ।
गण्डकी, कर्णाली र सुदूरपश्चिमका उच्च पहाडी तथा हिमाली क्षेत्रमा मध्यम हिमपातको सम्भावनासमेत रहेको छ । मौसम परिवर्तनसँगै विशेषगरी पहाडी र हिमाली भेगमा चिसो बढ्ने, यातायात तथा दैनिक जनजीवनमा असर पार्न सक्ने भएकाले आवश्यक सतर्कता अपनाउन महाशाखाले अनुरोध गरेको छ ।

























