
भक्तपुर । भक्तपुरको मध्यपुरथिमी नगरपालिका–२ सानोथिमीस्थित बाल सुधारगृहमा बिहीबार राति हिंसात्मक झडप भएको छ । आगजनी र तोडफोडसमेत भएको छ ।
सुधारगृहभित्र रहेका २ समूहबीच सुरु भएको आपसी विवाद केही समयमै नियन्त्रणबाहिर गएर हिंसात्मक झडपमा परिणत भएको थियो । त्यसपछि भवनभित्र आगजनी र तोडफोड गरेर भौतिक संरचनामा क्षति पुर्याइएको छ ।
घटनाको जानकारी पाउनसाथ थिमी प्रहरी वृत्तका प्रमुख डीएसपी नवराज ढुंगानाको नेतृत्वमा प्रहरी सुधारगृह पुगेको थियो । तर, झडपमा संलग्न दुवै समूहले स्थिति शान्त पार्न पुगेका प्रहरीमाथि नै ढुंगामुढा गरेपछि अवस्था थप तनावपूर्ण बनेको थियो । परिस्थिति नियन्त्रणबाहिर जान थालेपछि सशस्त्र प्रहरीसमेत परिचालन गरियो ।
मध्यराति आगो फैलिन थालेपछि भक्तपुर र काठमाडौं महानगरपालिकाका वारुणयन्त्रहरू प्रयोग गरी आगो नियन्त्रणमा लिइएको प्रहरीले जनाएको छ । आगलागीका कारण सुधारगृहभित्र कति क्षति भयो भन्ने यकिन विवरण प्राप्त भइसकेको छैन ।
बाल सुधारगृहमा हाल १ सय ४५ जना पुरुष र २४ जना महिला गरी कुल १ सय ६९ जना कानुनी विवादमा परेका बालक तथा बालिकाहरू रहेका छन् । घटनापछि सबैलाई सुरक्षित स्थानमा राखिएको र कुनै मानवीय क्षतिको विवरण अहिलेसम्म नआएको प्रहरीले जनाएको छ ।
हाल स्थिति पूर्ण रूपमा नियन्त्रणमा रहेको भए पनि पुनः कुनै अप्रिय घटना नहोस भनेर सुधारगृह परिसर र आसपासको क्षेत्रमा बाक्लो संख्यामा सुरक्षाकर्मी परिचालन गरिएको छ । झडप कसरी सुरु भयो र त्यसको कारण के हो भन्ने विषयमा थप अनुसन्धान भइरहेको प्रहरीको भनाइ छ ।

























