
काठमाडौँ । नेपाल टेलिकमको ल्यान्डलाइन र मोबाइल फोनमा बज्ने ‘रिङ ब्याक टोन’ बन्द गर्न माग गर्दै सर्वोच्च अदालतमा दायर रिटको पेसी चढेको छ। अधिवक्ता विमल पोखरेलले दायर गरेको उक्त रिटमा न्यायाधीशहरू मनोजकुमार शर्मा र श्रीकान्त पौडेलको संयुक्त इजलासमा सुनुवाइका लागि पेसी तोकिएको हो।
अधिवक्ता पोखरेलले नेपाल टेलिकम, सञ्चार तथा सूचना प्रविधि मन्त्रालय र नेपाल दूरसञ्चार प्राधिकरणलाई विपक्षी बनाएका छन्। टेलिकमले बारम्बार बजाइरहने अनावश्यक ‘रिङ ब्याक टोन’ का कारण उपभोक्ताहरू आजित भएको र यसले गर्दा मानिसहरू ह्वाट्सएप, म्यासेन्जर र भाइवरजस्ता विदेशी कम्पनीको सेवा लिन बाध्य भएको रिटमा उल्लेख छ।
विदेशी सेवा प्रदायकहरू नेपालमा दर्ता नभएकाले देशको राजस्वमा घाटा लागिरहेको र उपभोक्तालाई इच्छा विपरीत धुन सुन्न बाध्य पार्दा मानसिक तनाव सिर्जना भएको जिकिर रिटमा गरिएको छ। चाडपर्व, मेला र दिवसका अवसरमा बजाइने यस्ता धुनहरू तत्काल बन्द गर्न परमादेशलगायत आवश्यक आदेश जारी गर्न माग गरिएको छ।

























