
काठमाडौँ। नेपाली कांग्रेसका पूर्व सांसदहरू सर्वोच्च अदालत जाने कार्यक्रम अन्तिम समयमा आएर स्थगित भएको छ। प्रधानन्यायाधीश प्रकाशमान सिंह राउतको समय नमिलेका कारण बिहीबारका लागि तय भएको सो कार्यक्रम स्थगित गरिएको हो।
कांग्रेसले सूचना जारी गर्दै ‘विशेष कारण’ले कार्यक्रम रोकिएको जनाएको छ। विघटित प्रतिनिधिसभाका पूर्व प्रमुख सचेतक श्यामकुमार घिमिरेले प्रधानन्यायाधीशको सचिवालयले समय उपलब्ध गराउन नसकेको जानकारी दिए।
घिमिरे नेतृत्वको टोली बिहान १०:३० बजे सर्वोच्च जाने तयारीमा थियो। कांग्रेसका ६५ पूर्व सांसदहरूले संसद् पुनःस्थापनाको माग गर्दै रिट दायर गरेका छन्, तर सर्वोच्चले हालसम्म उक्त रिटको सुनुवाइ सुरु गरेको छैन। सोही विषयमा ध्यानाकर्षण गराउन नेताहरू सर्वोच्च जाने तयारीमा थिए।

























