
काठमाडौँ। नागरिक उन्मुक्ति पार्टीका संरक्षक रेशमलाल चौधरीले निर्वाचन आयोगको निर्णय विरुद्ध दायर गरेको रिटमा आज बिहीबार सर्वोच्च अदालतमा सुनुवाइ हुँदैछ। आगामी फागुन २१ गते हुने प्रतिनिधिसभा सदस्यको निर्वाचनका लागि कैलाली क्षेत्र नम्बर १ बाट उनले दर्ता गरेको उम्मेदवारी आयोगले खारेज गरिदिएपछि चौधरी सर्वोच्च पुगेका थिए।
सर्वोच्च अदालतले उक्त रिटको सुनुवाइका लागि न्यायाधीशद्वय बालकृष्ण ढकाल र नृपध्वज निरौलाको संयुक्त इजलासमा पेसी तोकेको छ।
यसअघि न्यायाधीश बालकृष्ण ढकालको एकल इजलासले निर्वाचन आयोगसँग लिखित जवाफ माग गर्दै अन्तरिम आदेश दिने वा नदिने भन्नेबारे छलफल गर्न दुवै पक्षलाई बोलाएको थियो। आजको सुनुवाइले चौधरीको उम्मेदवारी कायम रहने वा नरहने भन्नेबारे महत्वपूर्ण निर्णय दिन सक्ने देखिएको छ।

























