
काठमाडौं । देशभर पछिल्लो समय सक्रिय रहेको पश्चिमी वायुको प्रभाव क्रमशः कमजोर बन्दै गएको छ ।
मौसम पूर्वानुमान महाशाखाका अनुसार हाल नेपालमा पश्चिमी वायुको आंशिक प्रभाव मात्रै कायम छ । जसका कारण मौसममा ठूलो फेरबदल देखिएको छैन ।
हिमाली भू–भागमा सामान्यतया बादल लागे पनि पहाडी तथा हिमाली क्षेत्रका अधिकांश स्थानमा मौसम प्रायः सफा रहने पूर्वानुमान छ । पहाडी र हिमाली क्षेत्रको मौसम खुल्दै गएको छ । तराई क्षेत्रमा भने चिसो मौसमसँगै कुहिरो र हुस्सुले दैनिक जनजीवनलाई सामान्य प्रभावित बनाउने अनुमान गरिएको छ ।
महाशाखाका अनुसार आज (बिहीबार) दिउँसो तराई भू–भागका धेरै स्थानमा हुस्सु र कुहिरो लाग्ने सम्भावना छ । विशेष गरी पूर्वी र मध्य तराईका केही जिल्लामा बिहान र साँझको समयमा कुहिरो बाक्लो हुने अनुमान छ ।
जसका कारण सडक तथा हवाई यातायातमा अस्थायी अवरोध सिर्जना हुन सक्छ । यद्यपि, पहाडी तथा हिमाली भूभागमा दिउँसो मौसम मुख्यतया सफा रहने पूर्वानुमान छ ।
रातिको समयमा पनि मौसमको अवस्था लगभग उस्तै रहने महाशाखाले जनाएको छ । तराईका केही स्थानमा कुहिरो र हुस्सु लाग्ने छ भने पहाडी र हिमाली भू–भागमा आकाश खुला रहने छ । पछिल्ला दिनहरूमा देखिँदै आएको चिसो र तुवाँलोको प्रभाव अझै केही दिन तराई क्षेत्रमा कायमै रहन सक्ने मौसमविद्हरूको अनुमान छ ।
महाशाखाले पश्चिमी न्यूनचापीय प्रणालीको प्रभाव कमजोर हुँदै गएकाले देशका कुनै पनि भू–भागमा उल्लेखनीय वर्षा वा हिमपातको सम्भावना नरहेको जानकारी दिइएको छ । मौसमविद्हरूका अनुसार कुहिरो र हुस्सुका कारण तराई क्षेत्रमा बिहानको समयमा दृश्यता घट्न सक्ने भएकाले सवारीसाधन चलाउँदा विशेष सतर्कता आवश्यक छ ।

























