
रौतहट । रौतहटको इसनाथ नगरपालिकामा राष्ट्रिय स्वतन्त्र पार्टी (रास्वपा) का उम्मेदवारको स्टिकर टाँसिएको गाडीले ठक्कर दिँदा एक बालिकाको मृत्यु भएको छ। बाटोमा खेलिरहेको अवस्थामा गाडीले ठक्कर दिँदा ४ वर्षीया बालिका अल्फा खातुनको ज्यान गएको हो।
मृतक बालिका सोही नगरपालिका निवासी सागिर मोहम्मदकी छोरी हुन्। रौतहट प्रहरीका प्रवक्ता डीएसपी विष्णुप्रदीप बस्यालका अनुसार रास्वपा क्षेत्र नम्बर–२ का उम्मेदवार सेख सागिरको प्रचारमा प्रयोग भएको बा १५ च ४२४४ नम्बरको गाडीले बालिकालाई ठक्कर दिएको थियो। गम्भीर घाइते भएकी उनलाई उपचारका लागि लैजाँदै गर्दा मृत्यु भएको हो।
दुर्घटनाका बेला गाडीमा रास्वपाको उम्मेदवारको स्टिकर टाँसिएको भए पनि उम्मेदवार सागिर भने सवार थिएनन्। प्रहरीले ठक्कर दिने गाडीलाई नियन्त्रणमा लिएको छ भने दुर्घटनापछि फरार रहेका चालकको खोजी कार्य जारी राखेको छ।

























