निर्वाचनको अघिल्लो दिनभित्र उजुरीको निर्णय गरिसक्ने आयोगको तयारी

Share this
637shares
मुलुकी खबर
मुलुकी खबर
clock२०८२ फागुन १५, शुक्रबार १७:१५

काठमाडौं । निर्वाचन आयोगले प्रतिनिधिसभा निर्वाचनसँग सम्बन्धित आचारसंहिता उल्लंघनका उजुरीमाथि छानबिन एवं कारबाही तीव्र गतिमा भइरहेको जनाएको छ ।

आयोगले देशभरका सबै १६५ प्रतिनिधिसभा निर्वाचन क्षेत्रबाट परेको उजुरीमध्ये एक हजारभन्दा बढीको कारबाही भइसकेको जानकारी दिँदै बाँकी उजुरीहरू पनि निर्वाचनको अघिल्लो दिनभित्र टुंग्याउने तयारी गरेको स्पष्ट पारेको छ । फागुन २१ गते निर्वाचन हुँदैछ । परेका सबै उजुरीको निर्णय २० गतेभित्रमा गरिसक्ने आयोगको तयारी छ ।

शुक्रबार आयोजित पत्रकार भेटघाट कार्यक्रममा निर्वाचन आयोगका कार्यवाहक प्रमुख निर्वाचन आयुक्त रामप्रसाद भण्डारीले आचारसंहिता उल्लंघनका विषयमा आयोग कठोर र सजग रहेको बताएका छन् । उनका अनुसार आयोगमा प्राप्त प्रतिवेदनले १६५ वटै निर्वाचन क्षेत्रमा गरी एक हजारभन्दा बढी कारबाही गरिएको देखाएको छ ।

त्यसको अतिरिक्त कसैले आचारसंहिता उल्लंघन गर्‍यो भने उसलाई स्पष्टीकरण सोधेर त्यसको फाइल विश्लेषण गरेर निर्णय गरिने उनको भनाइ छ । उनले उजुरी प्राप्त भएलगत्तै सम्बन्धित पक्षसँग स्पष्टीकरण माग्ने, प्रमाण संकलन गर्ने र त्यसको समग्र विश्लेषणपछि निर्णय लिने प्रक्रिया अपनाइएको बताए ।

आयोगका अनुसार निर्वाचन आचारसंहिता उल्लंघनका घटनामा जरिबाना गर्ने, चेतावनी दिने, स्पष्टीकरण सोध्ने, प्रचार सामग्री हटाउन निर्देशन दिने लगायतका सजायमुखी निर्णयहरू गरिएको छ । भण्डारीले आचारसंहिता उल्लंघनलाई सामान्य रूपमा नलिइने स्पष्ट गर्दै कानुनअनुसार कडाइका साथ निर्णय भइरहेको बताए ।

उनले निर्वाचन निष्पक्ष, स्वतन्त्र र पारदर्शी बनाउन आचारसंहिताको पूर्ण पालना अनिवार्य रहेको उल्लेख गरे । ‘निर्वाचन हुनुपूर्व जति पनि उजुरी परेको छ, २० गतेभित्र हामी निर्णय गरिसक्छौँ,’ उनले भने । मतदान हुनुअघि सबै उजुरी टुंग्याएर निर्वाचन प्रक्रियालाई विवादरहित बनाउने लक्ष्य आयोगको छ ।

आयोगले निर्वाचन अवधिभर प्राप्त हुने उजुरीहरूलाई प्राथमिकताका आधारमा वर्गीकरण गरी छिटोछरितो निर्णय प्रक्रिया अघि बढाएको जनाएको छ । प्रदेश तथा जिल्ला तहका निर्वाचन कार्यालयहरूबाट प्राप्त विवरणहरू केन्द्रमा संकलन गरी समन्वयात्मक रूपमा कारबाही भइरहेको आयोगको भनाइ छ ।

राजनीतिक दल, उम्मेदवार, सार्वजनिक पदधारण गरेका व्यक्तिहरू तथा सरकारी संयन्त्रबाट आचारसंहिता उल्लंघन भएको उजुरीहरू आयोगमा परेका छन् । विशेषगरी प्रचारप्रसारका क्रममा सरकारी स्रोत साधनको प्रयोग, मतदातालाई प्रभाव पार्ने अभिव्यक्ति, अनुमति बिना सभा रजुलुस, आचारसंहिता विपरीत प्रचार सामग्री प्रयोगजस्ता विषयमा उजुरीहरू दर्ता भएका छन् ।

कार्यवाहक प्रमुख आयुक्त भण्डारीले राजनीतिक दल र उम्मेदवारहरूलाई आचारसंहिताको पूर्ण पालना गर्न पुनः आग्रह गर्दै उल्लंघन भए तत्काल कारबाही हुने चेतावनी पनि दिएका छन् । उनले आयोग कुनै पक्षप्रति नरम वा कठोर नभई कानुन र प्रमाणका आधारमा निर्णय गर्ने संस्थागत अभ्यासमा रहेको बताए ।

निर्वाचनको मिति नजिकिँदै गर्दा आयोगले उजुरी व्यवस्थापनलाई उच्च प्राथमिकतामा राखेको छ । निर्वाचन प्रक्रियालाई स्वच्छ, मर्यादित र विश्वसनीय बनाउन प्रतिबद्ध रहेको सन्देश आयोगले दिएको छ ।

तपाइको प्रतिक्रिया
 एनपिएलको तेस्रो संस्करण कात्तिक ९ देखि
फाइनल पुग्न लुम्बिनी र सुदूरपश्चिमबीच निर्णायक भिडन्त
प्रधानमन्त्री बालेनको भारत भ्रमण : दिल्लीमा छोटो बसाइ, नेपालका एजेन्डा लामै
विराटनगरबाट लागुऔषधसहित एक युवक पक्राउ
ब्राउन सुगरसहित इटहरीका दुई युवक पक्राउ
कोशी प्रदेशमा एकै दिन १७ सवारी दुर्घटना, २३ जना घाइते (पूरा विवरणसहित)
बराहक्षेत्रमा चलिरहेको मोटरसाइकलबाट खसेकी युवतीको उपचारका क्रममा मृत्यु
कोशी र गण्डकीका हिमाली क्षेत्रमा वर्षा र हिमपातको सम्भावना
स्थानीय निर्वाचनको तयारीमा एमाले, ३ हजार ४१४ नेता–कार्यकर्तासहितको राष्ट्रिय भेला
यस्तो छ विदेशी मुद्राको विनिमय दर
यस्तो छ विदेशी मुद्राको विनिमयदर
पटकाको बारुद चुलोमा हाल्दा जलेर सुनसरीका बालक घाइते
अस्पतालको आशामा जग्गा दिए, नबनेपछि मुख्यमन्त्री कार्यालय अगाडि आमरण अनशन
© 2024 Muluki Khabar. All Rights Reserved. Design & Develop By: Indesign Media Pvt. Ltd.