
विराटनगर। नेपाल यातायात व्यवसायी राष्ट्रिय महासङ्घका पूर्व अध्यक्ष हिरा उदासको विराटनगरस्थित विराट टिचिङ अस्पतालमा उपचारका क्रममा शनिबार निधन भएको छ। विगत पाँच दशकदेखि यातायात क्षेत्रमा निरन्तर क्रियाशील उदासलाई यस क्षेत्रका ‘भीष्म पितामह’ का रूपमा चिनिन्थ्यो।
महासङ्घले एक शोक वक्तव्य जारी गर्दै स्वर्गीय उदासले सार्वजनिक यातायात क्षेत्रको बृहत् एकता, समुन्नत विकास र सुधारमा अतुलनीय योगदान पुर्याएको जनाएको छ। उनको निधनले समग्र यातायात जगतमा अपूरणीय क्षति पुगेको महासङ्घको ठहर छ।
पूर्व अध्यक्ष उदासको निधनप्रति गहिरो दुःख व्यक्त गर्दै महासङ्घले उनको सम्मानमा सातवटै प्रदेश कार्यालयहरूमा तीन दिनसम्म आधा झण्डा झुकाउने निर्णय गरेको छ। उनको पार्थिव शरीरलाई अन्तिम श्रद्धाञ्जलीका लागि विराटनगरमै राखिने र त्यसपछि अन्त्येष्टि गरिने पारिवारिक स्रोतले जनाएको छ।

























