
काठमाडौं । प्रतिनिधि सभा निर्वाचनको पछिल्लो मतपरिणाम अनुसार नेपाली कम्युनिस्ट पार्टी (नेकपा) ले इतिहासकै सबैभन्दा खराब नतिजाको सामना गरेको छ । आइतबार अपराह्न ५ बजेसम्म ४५ लाख ३० हजार ९१३ समानुपातिक मत गणना हुँदा नेकपाले जम्मा ३ लाख ४ हजार ६२ मत प्राप्त गरेको छ । प्रत्यक्षतर्फको नतिजामा समेत धक्का लागेपछि नेकपा संसद्को चौथो शक्तिका रूपमा सीमित भएको छ ।
पार्टी अध्यक्ष पुष्पकमल दाहाल ‘प्रचण्ड’ र माधवकुमार नेपालले विभिन्न २५ घटकलाई मिलाएर निर्णायक शक्ति बन्ने लक्ष्यका साथ नेकपा निर्माण गरे पनि मतदाताले त्यसलाई अस्वीकार गरिदिएका छन् । २०६४ सालको संविधानसभा निर्वाचनमा २२९ सिटसहित पहिलो शक्ति बनेको माओवादी र पछि एमालेसँगको एकताबाट झण्डै दुईतिहाइ मत प्राप्त गरेको यो राजनीतिक धार अहिले अस्तित्व जोगाउने संकटमा पुगेको छ ।
भदौ २३ र २४ को ‘जेनजी विद्रोह’ पछि बदलिएको राजनीतिक समीकरण र राष्ट्रिय स्वतन्त्र पार्टी (रास्वपा) को पक्षमा देखिएको अभूतपूर्व जनलहर नै नेकपाको हारको मुख्य कारण देखिएको छ ।
२०४८ सालदेखि निरन्तर तेस्रो स्थान ओगट्दै आएको यो शक्ति यसपटक रास्वपा, कांग्रेस र एमालेभन्दा पछि धकेलिएको छ । २०७९ को निर्वाचनमा ३२ सिट जितेर ‘किङ मेकर’ को भूमिकामा रहेको माओवादी केन्द्र सम्मिलित यो नयाँ संरचनाले अहिले प्रत्यक्षतर्फ मात्र ७ सिटमा चित्त बुझाउनु परेको छ । सुशीला कार्की नेतृत्वको अन्तरिम सरकारले गराएको यस निर्वाचनले पुराना दलहरूको सिन्डिकेट तोड्दै नयाँ शक्तिलाई सत्ताको बागडोर सुम्पिने संकेत गरेको छ ।

























