
मध्यपूर्वमा इरान र इजरायल–अमेरिकाबीच भीषण तनाव जारी रहेकै समयमा अमेरिकी राष्ट्रपति डोनाल्ड ट्रम्पले इरानी राष्ट्रिय फुटबल टोलीलाई आगामी विश्वकप खेल्न अमेरिकामा स्वागत गरिने बताएका छन् । फिफा अध्यक्ष जियानी इन्फान्टिनोले सामाजिक सञ्जाल इन्स्टाग्राममार्फत राष्ट्रपति ट्रम्पसँगको भेटबारे जानकारी दिँदै सो कुरा उल्लेख गरेका हुन् ।
सन् २०२६ मा उत्तर अमेरिकामा आयोजना हुन लागेको विश्वकपका लागि इरानले यसअघि नै छनोट चरण पार गरिसकेको छ । इन्फान्टिनोका अनुसार वासिङ्टनमा भएको सो भेटमा विश्वकपको तयारी र सुरक्षाका विषयमा विस्तृत छलफल भएको थियो ।
राष्ट्रपति ट्रम्पले मध्यपूर्वमा जारी सैन्य कारबाहीका बाबजुद पनि खेलकुदलाई राजनीतिको छायामा नराख्ने आशय व्यक्त गरेका छन् । उनले इरानी टोलीको सहभागितामा कुनै बाधा नहुनेमा जोड दिएका हुन् । ‘छलफलका क्रममा राष्ट्रपति ट्रम्पले इरानी टोलीलाई संयुक्त राज्य अमेरिकामा प्रतिस्पर्धा गर्न अवश्य पनि स्वागत गरे,’ इन्फान्टिनोले लेखेका छन् ।
यस निर्णयले युद्धको तनावका बीच पनि विश्व खेलकुद जगत्मा केही आशाको सञ्चार गरेको छ ।



















