
काठमाडौँ। काठमाडौँ प्रहरीले कलाकार सागर लम्साल ‘बले’लाई अभद्र व्यवहारसम्बन्धी कसुरमा पक्राउ गरी अनुसन्धान अघि बढाएको छ। सामाजिक सञ्जालमा उनीमाथि बलात्कारको आरोप लागेको भन्ने हल्ला फैलिएपछि प्रहरीले त्यसको पूर्ण रूपमा खण्डन गरेको हो।
जिल्ला प्रहरी परिसर काठमाडौँले सोमबार विज्ञप्ति जारी गर्दै लम्साललाई जिल्ला प्रशासन कार्यालयबाट म्याद थप गरी हिरासतमा राखिएको जानकारी दिएको छ। विभिन्न सामाजिक सञ्जाल र केही माध्यमबाट फैलाइएका अप्रमाणित तथा भ्रामक सूचनाप्रति ध्यानाकर्षण भएको जनाउँदै प्रहरीले यस्ता भ्रम नफैलाउन आग्रह गरेको छ।
प्रहरीका अनुसार लम्सालविरुद्ध अभद्र व्यवहारसम्बन्धी उजुरी परेकाले सोही आधारमा मात्र अनुसन्धान भइरहेको हो। प्रवक्ता एसपी पवनकुमार भट्टराईले बलात्कारसम्बन्धी कुनै उजुरी दर्ता नभएको स्पष्ट पारेका छन्। प्रहरीले घटनाबारे विस्तृत विवरण नखुलाए पनि अनुसन्धान जारी रहेकाले आधिकारिक सूचनामा मात्र विश्वास गर्न सर्वसाधारणलाई अनुरोध गरेको छ।

























