विराटनगर आँखा अस्पतालमा ‘डिजिटल ट्रेनिङ हब’ को सुरुवात 

विराटनगर । नेपालको आँखा स्वास्थ्य उपचारमा अग्रणी मानिने विराटनगर आँखा अस्पतालले चिकित्सा क्षेत्रमा अत्याधुनिक प्रविधिको प्रयोगलाई आत्मसात् गर्दै ‘डिजिटल ट्रेनिङ हब’ सञ्चालनमा ल्याएको छ । चिकित्सकहरूको व्यावसायिक क्षमता विकास, नवप्रवर्तन र अत्याधुनिक प्रविधिमा पहुँच पुर्‍याउने उद्देश्यले यो हबको सुरुवात गरिएको हो ।

नेपाल नेत्र ज्योति संघद्वारा सञ्चालित यस अस्पतालले भविष्यमा आँखा स्वास्थ्यका क्षेत्रमा थप दक्ष, सीपयुक्त र अन्तर्राष्ट्रिय स्तरको जनशक्ति उत्पादन गर्ने लक्ष्य राखेको छ । यस डिजिटल हबले गुणस्तरीय सेवा विस्तारमा कोसेढुंगा साबित हुने विश्वास गरिएको छ ।

Advertisement

तालिम हबको उद्‌घाटन गर्दै कोशी प्रदेशका स्वास्थ्य मन्त्री मानबहादुर लिम्बूले स्वास्थ्य क्षेत्रमा दक्ष जनशक्तिको अभाव चुनौतीपूर्ण रहेको बताए । उनले विराटनगर आँखा अस्पतालले सुरु गरेको यो डिजिटल ट्रेनिङ हबले मुलुकको स्वास्थ्य रणनीति ‘भिजन २०३०’ लाई सफल बनाउन ठुलो सहयोग पुर्‍याउने छ । प्रविधिमैत्री जनशक्तिले नै स्वास्थ्य क्षेत्रको भविष्य सुनिश्चित गर्छ ।’

यस नवनिर्मित डिजिटल हबमा एक पटकमा १५ देखि २० जना चिकित्सक तथा स्वास्थ्यकर्मीहरूले विशिष्टीकृत तालिम प्राप्त गर्न सक्ने अस्पताल प्रशासनले जनाएको छ । यहाँ भर्चुअल र डिजिटल माध्यमबाट नवीनतम शल्यक्रिया विधि र उपचार पद्धतिका बारेमा निरन्तर क्षमता विकासका कार्यक्रमहरू सञ्चालन गरिने बताइएको छ ।

अस्पताल कोशी प्रदेशको मात्र नभई मधेस प्रदेश र छिमेकी राष्ट्र भारतका बिरामीहरूका लागि पनि भरपर्दो उपचार केन्द्र बनेको छ । अस्पतालको सेवा प्रवाहको तथ्यांक निकै उत्साहजनक छ । सन् २०२५ को अवधिमा ८ लाख ८ हजार ३ सय ६४ जनाको आँखा परीक्षण गरेको छ ।

८२ हजार ३ सय ४८ जनाको सफल शल्यक्रिया गरी दृष्टि प्रदान गरेको अस्पताल प्रशासनले जनाएको छ । यस डिजिटल ट्रेनिङ हबको स्थापनासँगै अस्पतालले केवल उपचारमा मात्र नभई शिक्षण र अनुसन्धानमा पनि आफूलाई दक्षिण एसियाकै एक उत्कृष्ट केन्द्रको रूपमा स्थापित गर्ने योजना बनाएको छ । डिजिटल प्रविधिमार्फत विश्वभरका विशेषज्ञहरूसँग जोडिएर अनुभव आदानप्रदान गर्न यसले सहज बनाउने अस्पतालले जनाएको छ ।