चट्याङ लागेर मोरङमा २ जना महिला घाइते

विराटनगर। मोरङका छुट्टाछुट्टै दुई स्थानमा चट्याङ लागेर २ जना महिला घाइते भएका छन्। आइतबार बिहान वर्षासँगै परेको चट्याङ लागेर पथरीशनिश्चरे र धनपालथानमा उनीहरू घाइते भएका हुन्।

प्रहरीका अनुसार बिहान करिब ७:५० बजे पथरीशनिश्चरे नगरपालिका–२ कालापानी बस्ने ४६ वर्षीया जानुका रेग्मी आफ्नै भान्सा घर अगाडि उभिरहेको अवस्थामा चट्याङ लागेर घाइते भएकी छन्। उनको दाहिने खुट्टामा चोट लागेको छ। रेग्मीको मदन भण्डारी अस्पताल तथा ट्रमा सेन्टर मंगलबारेमा उपचार भइरहेको र अवस्था सामान्य रहेको अस्पतालले जनाएको छ। घटनाको जानकारी पाएलगत्तै इलाका प्रहरी कार्यालय पथरीबाट प्रहरी टोली खटिएर थप जानकारी लिएको छ।

Advertisement

त्यसैगरी, बिहान ८:०० बजे धनपालथान गाउँपालिका–२ पैटा बस्ने ३० वर्षीया भाल्सा देवी ऋषिदेव आफ्नै घरमा बसिरहेको अवस्थामा चट्याङ लागेर घाइते भएकी छन्। उनलाई उपचारका लागि कोशी अस्पताल विराटनगर ल्याइएको छ। ऋषिदेवको अवस्था गम्भीर रहेको अस्पतालले जनाएको छ। घटनाको जानकारी पाएपछि प्रहरी चौकी अमाहिबरातीबाट प्रहरी टोली खटिएर थप अनुसन्धान गरिरहेको छ।