विकास आयोजनाको सुरक्षा खोज्दै युवा र व्यवसायी

विराटनगर । ताप्लेजुङका युवा अगुवा, निर्माण व्यवसायी र सरोकारवालाहरूले जिल्लाका ठुला विकास आयोजनाहरूलाई निर्धक्कसँग अघि बढाउने वातावरण मिलाउन नेपाल सरकारसँग माग गरेका छन् । बिहीबार प्रमुख जिल्ला अधिकारीमार्फत प्रधानमन्त्रीलाई ज्ञापनपत्र बुझाउँदै उनीहरूले निर्माणाधीन पाथीभरा केबलकार लगायतका आयोजनाको सुरक्षा सुनिश्चित गर्न आग्रह गरेका हुन् ।

ताप्लेजुङ विकासप्रेमी युवा समाजका संयोजक प्रकाश मादेनसहितको टोलीले बुझाएको ज्ञापनपत्रमा केबलकार, जलविद्युत आयोजना, प्रसारण लाइन र अन्य उद्योग व्यवसायमा संलग्न लगानीकर्ताको सुरक्षामा विशेष ध्यान दिन भनिएको छ ।

Advertisement

ज्ञापनपत्रमा सुकेटार–काफ्लेपाटी सडक खण्ड (११ किमी) को कालोपत्रे कार्य छिटो सम्पन्न गर्न प्रधानमन्त्रीको ध्यानाकर्षण गराइएको छ । पाथीभरा (मुक्कुमलुङ) क्षेत्रको धार्मिक र सांस्कृतिक महत्वलाई जोगाउँदै केबलकार निर्माणले जिल्लाको पर्यटन र अर्थतन्त्रमा ठुलो टेवा पुग्ने उनीहरूको विश्वास छ ।

‘स्थानीयकै मागअनुसार निजी क्षेत्रले लगानी गरेको यो आयोजना चाँडो सम्पन्न हुनुपर्छ भन्ने आम अपेक्षा छ,’ ज्ञापनपत्रमा भनिएको छ, ‘केबलकार सञ्चालनमा आएपछि रोजगारी सिर्जना हुने र समग्र जिल्लाकै आर्थिक गतिविधि चलायमान हुनेछ ।’

ज्ञापनपत्रमा युवा समाजका संयोजक प्रकाश मादेन, निर्माण व्यवसायी महासंघ ताप्लेजुङका अध्यक्ष जसबहादुर चेम्जोङ, उपाध्यक्ष इन्द्र केदेम, जेन जी ताप्लेजुङका संयोजक गोपाल गुरागाईं र युवा अगुवा सागर लामगादेले हस्ताक्षर गरेका छन् ।

उनीहरूले विकास निर्माणमा अवरोध पुर्‍याउने तत्त्वहरूलाई निरुत्साहित गरी लगानीमैत्री वातावरण बनाउन सरकारसँग जोडदार माग गरेका छन् ।