सेयर बजारमा पहिरो : नेप्से ३९ अंकले घट्दा ४ अर्ब ६६ करोडको कारोबार

काठमाडौं । अघिल्ला तीन कारोबार दिन लगातार बढेको सेयर बजार मंगलबार भने ओरालो लागेको छ । बजारको परिसूचक नेप्से अघिल्लो दिनको तुलनामा आज ३९.४४ अंक (१.४१ प्रतिशत) घटेर २७४४ अंकमा अडिएको छ । अघिल्लो दिन नेप्से परिसूचक ३८.१९ अंकले बढेको थियो ।

सरकारले आगामी आर्थिक वर्ष २०८३/८४ को नीति तथा कार्यक्रम प्रस्तुत गरेकै भोलिपल्ट बजारमा गिरावट देखिएको हो । नीति तथा कार्यक्रममा गैरआवासीय नेपालीलाई बजारमा सहभागी गराउने, नेप्सेको पुनर्संरचना गर्ने र बन्ड बजार विस्तार गर्ने जस्ता पुराना विषय दोहोरिए पनि कार्यान्वयन पक्षमा लगानीकर्ताले विश्वास गर्न नसक्दा बजार प्रभावित बनेको हो ।

Advertisement

बजार घटे पनि कारोबार रकममा भने सामान्य वृद्धि भएको छ । अघिल्लो दिन ४ अर्ब ६१ करोडको कारोबार भएकोमा आज ४ अर्ब ६६ करोड रुपैयाँ बराबरको सेयर किनबेच भयो । आज जम्मा १३ कम्पनीको मूल्य बढ्दा २५१ कम्पनीको मूल्य घटेको छ भने ५ कम्पनीको मूल्य स्थिर रह्यो । सबैजसो उपसमूहका सूचक राताम्मे भएका छन् । जसमा व्यापार समूह २.३३, हाइड्रोपावर २.२२, फाइनान्स २.०३ र होटल तथा पर्यटन समूह २.०२ प्रतिशतले घटे ।

आज धौलागिरि लघुवित्तको मूल्य सबैभन्दा धेरै १५ प्रतिशतले बढ्यो भने फर्स्ट माइक्रोफाइनान्सको मूल्य १२.४० प्रतिशतले घट्यो । त्यस्तै झापा इनर्जी, आत्मनिर्भर लघुवित्त र होटल फरेस्ट इनको मूल्यमा पनि उल्लेख्य गिरावट आयो । धेरै कारोबार हुने कम्पनीहरूमा नेसनल हाइड्रोपावर, रिलायन्स स्पिनिङ मिल्स, रिडी पावर, शिवम् सिमेन्ट र एसवाई प्यानल अगाडि रहे ।