विराटनगरको इदगाहमा बकर इदको रौनकः सामूहिक नमाज र खुसीयाली (फोटो फिचर)

विराटनगर । मुस्लिम धर्मावलम्बीहरूको दोस्रो ठुलो महान् पर्व बकर इद (इदुल जोहा) बिहीबार (आज) देशभरका साथै विराटनगरमा पनि धार्मिक विधिपूर्वक र हर्षोल्लासका साथ मनाइएको छ ।

Advertisement

बिहानैदेखि विराटनगर–१३ स्थित ऐतिहासिक इदगाहमा भेला भएका सयौँ श्रद्धालुहरूले सामूहिक रूपमा नमाज अदा गरेका छन् । त्याग, आस्था र आपसी सद्भावको प्रतीक मानिने यस पर्वका अवसरमा सामूहिक नमाजपछि मुस्लिम समुदायका सदस्यहरूले एक अर्कालाई अंकमाल गर्दै शुभकामना साटासाट गरेका थिए ।

धार्मिक परम्परा अनुसार नमाज पढिसकेपछि आफ्नो गच्छे अनुसारको पशु बलि (कुर्बानी) दिने र त्यसलाई तीन भागमा बाँड्ने प्रचलन छ । जसमध्ये एक भाग परिवारका लागि, एक भाग आफन्तका लागि र एक भाग गरिब तथा असहायका लागि छुट्याइन्छ । यसले समाजमा समानता र भ्रातृत्वको सन्देश प्रवाह गर्ने विश्वास गरिन्छ ।

पर्वको विशेष अवसरमा मस्जिद र इदगाहहरूमा श्रद्धालुहरूको बाक्लो उपस्थिति रहेको थियो । नमाजपछि धार्मिक गुरु (इमाम) हरूसँग आशीर्वाद लिँदै मुस्लिम समुदायले मुलुकमा शान्ति र समृद्धिको कामना समेत गरेका छन् ।

बकर इदमा आर्थिक रूपमा सबल हुनेहरूले विपन्न वर्गलाई दान–दक्षिणा (जकात र फित्रा), खाद्यान्न र लत्ताकपडा वितरण गरी खुसी साट्ने गर्छन् । घर–घरमा आफन्त र इष्टमित्रहरूलाई निमन्त्रणा गरी विभिन्न मिष्ठान्न परिकार खुवाउने र शुभकामना आदानप्रदान गर्ने क्रम दिनभर जारी छ ।

यस पर्वले नेपाली समाजमा विद्यमान धार्मिक सहिष्णुता र आपसी भ्रातृत्वलाई अझ मजबुत बनाउन मद्दत पुग्ने स्थानीय अगुवाहरूको भनाइ छ ।