जापानको सनसनीपूर्ण जित

अमेरिका । फिफा विश्वकपको १०००औँ खेल ऐतिहासिक मात्रै बनेन । एसियाली शक्ति जापानका लागि सम्झनलायक पनि बन्यो ।

समूह एफ अन्तर्गत मेक्सिकोको मोन्टेरेमा भएको खेलमा जापानले अफ्रिकी राष्ट्र ट्युनिसियामाथि ४–० को प्रभावशाली जित निकाल्दै नकआउट चरण प्रवेशको सम्भावनालाई थप बलियो बनाएको छ । लगातार उत्कृष्ट प्रदर्शन गरिरहेको जापानले दुई खेलबाट चार अंक जोडेको छ ।

Advertisement

समान चार अंक रहेको नेदरल्यान्ड्ससँग अंक बराबरी भए पनि अन्तिम खेलअघि जापान बलियो अवस्थामा पुगेको छ । उता लगातार दोस्रो हार बेहोरेको ट्युनिसिया भने समूह चरणबाटै बाहिरिएको छ ।

खेलको सुरुआतदेखि नै जापानले आफ्नो लय कायम राखेको थियो । चौथो मिनेटमै केइतो नाकामुराको पासमा दाइची कामाडाले गोल गर्दै जापानलाई अग्रता दिलाए । सुरुमै गोल खाएपछि दबाबमा परेको ट्युनिसिया खेलमा फर्किन संघर्षरत देखियो ।

३१औँ मिनेटमा को इताकुराको पासलाई सदुपयोग गर्दै असाय उएदाले गोल गरेपछि जापानले पहिलो हाफमै २–० को सहज अग्रता बनाएको थियो । खेलमा स्पष्ट रूपमा हाबी रहेको जापानले ६२ प्रतिशत समय बल आफ्नो नियन्त्रणमा राख्यो । ११ वटा प्रहार गरेको जापानका पाँच प्रहार पोस्टको दिशामा थिए । ट्युनिसियाले भने दुई प्रहार मात्र गर्न सक्यो । तर, कुनै पनि प्रहार लक्ष्यमा पुग्न सकेन ।

दोस्रो हाफमा पनि जापानको आक्रामकता कायमै रह्यो । ६९औँ मिनेटमा उएदाकै पासमा जुन्या इटोले गोल गर्दै खेललाई ३–० मा पुर्याए । त्यसपछि ८३औँ मिनेटमा काइसु सानोको पासमा उएदाले व्यक्तिगत दोस्रो तथा टोलीका लागि चौथो गोल गर्दै ट्युनिसियालाई पीडादायी हार बेहोर्न बाध्य बनाइदिए ।

दुई गोल र एक असिस्ट गरेका उएदा यस विश्वकपमा एकै खेलमा दुई गोल र एक असिस्ट गर्ने दोस्रो खेलाडी बने । यसअघि नेदरल्यान्ड्सका कोडी गाक्पोले स्वीडेनविरुद्ध समान उपलब्धि हासिल गरेका थिए ।

विश्वकप इतिहासमा जापानले ट्युनिसियालाई दोस्रो पटक पराजित गरेको हो । यसअघि सन् २००२ को विश्वकपमा घरेलु मैदानमा जापानले ट्युनिसियालाई २–० ले हराएको थियो । त्यसको २३ वर्षपछि जापानले अझ फराकिलो अन्तरको जित निकाल्दै आफ्नो उत्कृष्ट लयलाई निरन्तरता दिएको छ ।

जापानले पहिलो खेलमा नेदरल्यान्ड्ससँग २–२ को बराबरी खेलेको थियो । दोस्रो खेलमा शानदार प्रदर्शन गर्दै तीन अंक जोडेको जापान अब समूहको अन्तिम खेलमा स्वीडेनसँग भिड्नेछ । उक्त खेलले समूह विजेताको टुंगो लगाउन महत्वपूर्ण भूमिका खेल्नेछ ।

उता ट्युनिसियाको निराशाजनक यात्रा भने दोस्रो खेलमै समाप्त भएको छ । पहिलो खेलमा स्वीडेनसँग ५–१ ले पराजित भएको ट्युनिसियाले त्यसपछि मुख्य प्रशिक्षक साब्री लामोउचीलाई बर्खास्त गर्दै हार्भे रेनार्डलाई जिम्मेवारी दिएको थियो । तर, प्रशिक्षक परिवर्तनले पनि टोलीको नतिजामा कुनै सुधार ल्याउन सकेन ।

दुई खेलमै नौ गोल खाएको ट्युनिसिया यस विश्वकपमा सबैभन्दा धेरै गोल खाने टोलीसमेत बनेको छ । अब उसले समूह चरणको अन्तिम खेलमा नेदरल्यान्ड्ससँग प्रतिस्पर्धा गर्नेछ । तर, उक्त खेल ट्युनिसियाका लागि औपचारिकतामा सीमित रहनेछ ।

विश्वकपको १०००औँ खेलमा जापानले निकालेको सनसनीपूर्ण जितले एसियाली फुटबलको बढ्दो प्रभावलाई प्रष्ट पार्छ । आक्रामक खेल, प्रभावकारी फिनिसिङ र सामूहिक प्रदर्शनका कारण जापान नकआउट चरणतर्फ बलियो दाबेदारका रूपमा उभिएको छ ।