रास्वपाको बन्दसत्र रोकियो

चितवन । सत्तारुढ राष्ट्रिय स्वतन्त्र पार्टी (रास्वपा)को प्रथम महाधिवेशनअन्तर्गत सोमबारका लागि तय गरिएको बन्दसत्र अन्तिम समयमा स्थगित गरिएको छ ।

महाधिवेशन प्रतिनिधिको नामावलीमा गरिएको थपघट तथा मधेश प्रदेशसँग सम्बन्धित विवाद समाधान नभएपछि सञ्चालन हुन नसकेर बन्दसत्र रोकिएको हो । पार्टी स्रोतका अनुसार आन्तरिक रूपमा देखिएका विवादित विषयहरूलाई सहमतिमार्फत टुंग्याउन आवश्यक गृहकार्य गर्नुपर्ने भएकाले बन्दसत्रका सम्पूर्ण कार्यक्रम स्थगित गरिएको छ ।

Advertisement

समस्या समाधानका लागि नेतृत्व तहबीच विवाद समाधानका लागि छलफल र समन्वयको प्रयास जारी रहेको बताइएको छ । बन्दसत्रमा सहभागी हुन देशभरका महाधिवेशन प्रतिनिधिहरू बिहानैदेखि कार्यक्रमस्थलमा उपस्थित भएका थिए । दिनभर बन्दसत्र सुरु हुने प्रतीक्षामा बसेका उनीहरू अन्तिम समयमा कार्यक्रम स्थगित भएको जानकारी पाएपछि फर्किएका छन् ।

रास्वपाभित्र महाधिवेशन प्रतिनिधिको छनोट र मधेश प्रदेशसँग सम्बन्धित विषयलाई लिएर केही समययता असन्तुष्टि देखिँदै आएको छ । ती विषयमा सहमति जुटाउन पार्टी नेतृत्वले थप आन्तरिक छलफल अघि बढाएको छ । तर, बन्दसत्र कहिलेबाट सुरु हुन्छ भन्ने यकिन छैन ।