धरान औद्योगिक क्षेत्रमा ५ उद्योगको लिज खारेज, ३५ करोडको नयाँ लगानी

धरान । सुनसरीकाे धरान औद्योगिक क्षेत्रमा जग्गा ओगटेर लामो समयदेखि निष्क्रिय रहेका पाँच उद्योगको लिज सम्झौता रद्द भएकाे छ । रद्द भएकाे स्थानमा नयाँ उत्पादनमूलक उद्योग थपिएका छन् ।

औद्योगिक क्षेत्र व्यवस्थापन लिमिटेडले सरकारी जग्गा ओगट्ने तर उत्पादन नगर्ने उद्योगहरूलाई हटाएर नयाँ लगानीकर्तालाई स्थान दिएको हो ।

कार्यालय प्रमुख जीवनारायण बन्जाडेका अनुसार नेपाल न्यून नेटवर्क, शुभम् वाटर, जानकी प्रोडक्ट्स, फेमिली युटेन्सिल र कमना मल्टिफोर्ड इन्डस्ट्रिजको सम्झौता रद्द गरिएको हाे । ती उद्योगका ठाउँमा प्रीति भल्भ, जिडि स्टिल, सिद्धि विनायक, जेआर भेन्चर्स र सूर्य डायमन्ड इन्डस्ट्रिजसँग नयाँ सम्झौता गरिएको छ ।

नयाँ उद्योगहरू थपिएसँगै हालको आर्थिक मन्दीका बीच पनि औद्योगिक क्षेत्रमा ३५ करोड रुपैयाँ बराबरको स्वदेशी लगानी भित्रिएको छ । यी उद्योगहरू सञ्चालनमा आएपछि करिब ३ सय ५० जनाले प्रत्यक्ष रोजगारी पाउने कार्यालयले जनाएको छ । नयाँ उद्योगहरूले पानीका मिटर, फिटिङ सामग्री, निर्माण सामग्री, खाद्यान्न र भाँडाकुँडा उत्पादन गर्नेछन् ।

‘उत्पादनमुखी उद्योगलाई प्राथमिकता दिएर आयात प्रतिस्थापन र स्थानीय अर्थतन्त्र चलायमान बनाउने हाम्रो लक्ष्य हो,’ प्रमुख बन्जाडेले भने ।

२०३२ सालदेखि सञ्चालनमा आएको औद्योगिक क्षेत्रमा ३५ उद्योगमध्ये ३० वटा उद्याेग सञ्चालनमा छन् भने ५ वटा निर्माणका क्रममा छन् । २०२ रोपनीमा फैलिएको याे क्षेत्रमा निजी क्षेत्रको करिब २ अर्ब र सरकारी क्षेत्रको १६ करोड रुपैयाँ लगानी रहेको छ । खाली रहेका अन्य स्थानमा पनि उत्पादनमूलक उद्योग भित्र्याउने  प्रयास भइरहेकाे कार्यालयले जनाएको छ ।