रोनाल्डोको विश्वकप सपना समाप्त

Share this
723shares
मुलुकी खबर
मुलुकी खबर
clock२०८३ असार २३, मंगलबार ०६:४०

अमेरिका । विश्व फुटबलका महान् खेलाडी क्रिस्टियानो रोनाल्डोको विश्वकप जित्ने सपना अन्ततः अधुरै बनेको छ । अमेरिकाको टेक्सासमा सम्पन्न विश्वकप २०२६ को अन्तिम १६ चरणको रोमाञ्चक प्रतिस्पर्धामा पोर्चुगल छिमेकी प्रतिद्वन्द्वी स्पेनसँग १–० ले पराजित भएपछि ४१ वर्षीय रोनाल्डोको विश्वकप यात्रा समाप्त भएको हो ।

निर्धारित ९० मिनेटसम्म दुवै टोलीले गोल गर्न नसकेपछि खेल गोलरहित बराबरीतर्फ उन्मुख देखिएको थियो । तर, खेलको अन्तिम अतिरिक्त समयमा स्पेनका मिकेल मेरिनोले निर्णायक गोल गर्दै आफ्नो टोलीलाई अन्तिम आठ मा पुर्‍याए भने पोर्चुगलको यात्रामा पूर्णविराम लगाए ।

खेल समाप्तिपछि मैदान छाड्दै गर्दा रोनाल्डो निकै भावुक देखिएका थिए । समर्थकतर्फ हात हल्लाउँदै उनले सम्भवतः आफ्नो अन्तिम विश्वकपलाई बिदाइ गरे । प्रतियोगितापछि सञ्चारकर्मीसँग कुरा गर्दै रोनाल्डोले हारले दुःख दिएको स्वीकार गरे ।

उनले आफूले टोलीका लागि सक्दो योगदान दिएको उल्लेख गर्दै जित र हार खेलको स्वाभाविक पक्ष भएको बताए । आफ्नो कर्तव्य पूरा गरेको सन्तुष्टिका साथ मैदानबाट बिदा भएको उनको भनाइ थियो ।

अन्तर्राष्ट्रिय फुटबलमा सर्वाधिक १४६ गोल गर्ने कीर्तिमान बनाएका रोनाल्डोले यो आफ्नो अन्तिम विश्वकप भएको पुनः पुष्टि गरेका छन् । यद्यपि, पोर्चुगलको राष्ट्रिय टोलीबाट आगामी यात्रा के हुने भन्ने विषयमा भने उनले तत्काल कुनै निर्णय नगर्ने बताएका छन् ।

पोर्चुगल प्रतियोगिताबाट बाहिरिएसँगै टोलीका मुख्य प्रशिक्षक रोबर्टो मार्टिनेजले पनि पदबाट राजीनामा दिएका छन् । विश्वकप जिताउने लक्ष्य पूरा गर्न नसकेको भन्दै उनले पदमा बसिरहनुको औचित्य नरहेको बताए । उनले रोनाल्डोलाई विश्व फुटबलको एक महान् व्यक्तित्व भन्दै उनको योगदानको खुलेर प्रशंसा गरे ।

रोनाल्डोको बहिर्गमनसँगै विश्व फुटबलमा लामो समयदेखि चल्दै आएको रोनाल्डो र लियोनेल मेसीमध्ये को उत्कृष्ट भन्ने बहस फेरि चर्किएको छ । मेसीले सन् २०२२ मै अर्जेन्टिनालाई विश्वकप उपाधि दिलाइसकेका छन् भने जारी विश्वकपमा पनि सात गोलसहित उत्कृष्ट लयमा छन् । विश्वकपको इतिहासमा मेसीको नाममा २० गोल पुगेको छ भने रोनाल्डो ११ गोलमै सीमित भएका छन् ।

खेलको सुरुआतदेखि नै स्पेनले बल आफ्नो नियन्त्रणमा राख्दै आक्रमण बुन्ने प्रयास गरेको थियो भने पोर्चुगलले प्रतिआक्रमणको रणनीति अपनाएको थियो । पहिलो हाफमा रोनाल्डोले गरेको शक्तिशाली प्रहारलाई स्पेनका गोलरक्षक उनाई सिमोनले उत्कृष्ट बचाउ गरेका थिए । त्यस्तै, जोआओ फेलिक्सका केही राम्रा अवसर पनि उनले निष्फल बनाइदिए ।

पोर्चुगलको सुदृढ रक्षापंक्ति भत्काउन संघर्ष गरिरहेको स्पेनलाई अन्ततः अतिरिक्त समयमा मिकेल मेरिनोले राहत दिलाए । उनको एकमात्र गोल स्पेनलाई अन्तिम आठमा पुर्‍याउन पर्याप्त बन्यो । यस जितसँगै स्पेनले उपाधिको बलियो दाबेदारका रूपमा आफ्नो उपस्थितिलाई थप मजबुत बनाएको छ ।

विश्वकपको उपाधि जित्ने रोनाल्डोको सपना पूरा हुन नसके पनि उनले दुई दशकभन्दा बढी समयसम्म विश्व फुटबलमा स्थापित गरेका कीर्तिमान, नेतृत्व र योगदान भने सधैँ सम्मानका साथ स्मरण गरिनेछन् ।

तपाइको प्रतिक्रिया
मोरङमा ठूला चाडपर्व शान्तिपूर्ण, २१९ आपराधिक घटना
 एनपिएलको तेस्रो संस्करण कात्तिक ९ देखि
फाइनल पुग्न लुम्बिनी र सुदूरपश्चिमबीच निर्णायक भिडन्त
प्रधानमन्त्री बालेनको भारत भ्रमण : दिल्लीमा छोटो बसाइ, नेपालका एजेन्डा लामै
विराटनगरबाट लागुऔषधसहित एक युवक पक्राउ
ब्राउन सुगरसहित इटहरीका दुई युवक पक्राउ
कोशी प्रदेशमा एकै दिन १७ सवारी दुर्घटना, २३ जना घाइते (पूरा विवरणसहित)
बराहक्षेत्रमा चलिरहेको मोटरसाइकलबाट खसेकी युवतीको उपचारका क्रममा मृत्यु
कोशी र गण्डकीका हिमाली क्षेत्रमा वर्षा र हिमपातको सम्भावना
स्थानीय निर्वाचनको तयारीमा एमाले, ३ हजार ४१४ नेता–कार्यकर्तासहितको राष्ट्रिय भेला
यस्तो छ विदेशी मुद्राको विनिमय दर
यस्तो छ विदेशी मुद्राको विनिमयदर
पटकाको बारुद चुलोमा हाल्दा जलेर सुनसरीका बालक घाइते
© 2024 Muluki Khabar. All Rights Reserved. Design & Develop By: Indesign Media Pvt. Ltd.