मोरङबाट जुवा मुद्दाका चार जना फरार प्रतिवादी पक्राउ

विराटनगर । मोरङबाट जुवा मुद्दाका चार जना फरार प्रतिवादी पक्राउ परेका छन् । जिल्ला प्रशासन मोरङले एउटै मितिमा समान जरिबानाको फैसला गरेका प्रतिवादीहरु पक्राउ परेका हुन् ।

जिल्ला प्रहरी कार्यालय मोरङबाट खटिएको टोलीले कटहरी गाउँपालिका–१ का मोहनलाल राजवंशी, सुन्दरहरैँचा नगरपालिका–५ का इन्द्रप्रसाद आचार्य, सुनसरीको इटहरी उपमहानगरपालिका–९ का जयकिशोर साह र भोजपुरको हतुवागढी गाउँपालिका–३ का हेमन्त राईलाई बुधबार साँझ पक्राउ गरेको हो । पक्राउ परेकाहरुलाई जिल्ला प्रशासन कार्यालय मोरङले गत जेठ २८ गते जनही १५ हजार रूपैयाँ जरिबानाको फैसला सुनाएको थियो ।

पक्राउ परेकाहरुलाई प्रहरीले बिहीबार प्रशासन कार्यालयमा बुझाउने छ । प्रशासनले जरिबानाबापतको रकम असुलेर उनीहरुलाई छाड्ने छ । मोरङ प्रहरीका डीएसपी सन्तोष श्रेष्ठले फरार प्रतिवादी पक्राउलाई प्राथमितामा राखेर प्रहरीले काम गरिरहेको बताए ।