बैंक खाता अब मोबाइल एपबाटै बन्द गर्न सकिने

काठमाडौं । बैंक तथा वित्तीय संस्थाका ग्राहकले मोबाइल वा वेब एपमार्फत नै आफ्नो खाता बन्द गर्न सक्ने भएका छन् ।

नेपाल राष्ट्र बैंकले बैंकहरूलाई यस्तो व्यवस्था मिलाउन निर्देशन दिएको हो । याे निर्णय लागु भएपछि खाता बन्द गर्न सम्बन्धित बैंकको कार्यालय नै धाउनुपर्ने बाध्यता हट्ने छ ।

केन्द्रीय बैंकले निष्क्रिय खाता घटाउन पुससम्ममा कार्ययोजना लागू गर्नसमेत निर्देशन दिएको छ । अब खाता निष्क्रिय हुनुपूर्व र निष्क्रिय भएपछि पनि ग्राहकलाई कल, एसएमएस वा इमेलमार्फत जानकारी गराउनुपर्नेछ ।

देशभरका जुनसुकै शाखाबाट खाता पुनः सक्रिय गर्न सकिने र खाता बन्द गर्दा बाँकी रहेको रकम ग्राहकले तोकेको अर्को खातामा रकमान्तर गरिदिनुपर्ने व्यवस्था राष्ट्र बैंकले गरेको छ । निष्क्रिय खातामार्फत हुन सक्ने वित्तीय अपराध नियन्त्रण गर्न बैंकहरूले जनचेतनामूलक कार्यक्रम र कारोबारको निगरानीसमेत बढाउनुपर्ने राष्ट्र बैंकले जनाएकाे छ ।