रंगेलीमा प्रधानाध्यापकको उल्लेखनीय पहल : तलबको रकम विद्यालयमै लगानी

रंगेली । मोरङको रंगेली नगरपालिका–९ स्थित पार्वती माध्यमिक विद्यालयका प्रधानाध्यापक ओमप्रकाश सिंहले आफ्नै तलबबाट करिब पाँच लाख रुपैयाँ लगानी गर्दै विद्यालयको भौतिक तथा प्रशासनिक सुधारमा उल्लेखनीय पहल गरेका छन् ।

सामुदायिक विद्यालयमा शैक्षिक गुणस्तर, पूर्वाधार, आर्थिक पारदर्शिता र व्यवस्थापनका बारेमा बेला–बेला बहस भइरहेका बेला पार्वती माविमा देखिएको परिवर्तनलाई सकारात्मक उदाहरणका रूपमा हेरिएको छ । करिब दुई वर्षअघि प्रधानाध्यापकको जिम्मेवारी सम्हालेका सिंहका अनुसार त्यतिबेला विद्यालयको भौतिक अवस्था कमजोर थियो ।

Advertisement

भवनका झ्यालढोका जीर्ण थिए भने विद्यालयको खातामा करिब पाँच सय रुपैयाँ मात्र मौज्दात थियो । विद्यालयको समग्र सुधारलाई प्राथमिकतामा राख्दै उनले सरकारी बजेटको प्रतीक्षा नगरी आफ्नै तलबबाट रकम खर्च गरेका हुन् । उक्त रकमबाट झ्यालढोका मर्मत, आवश्यक पूर्वाधार सुधार तथा विद्यालय परिसर व्यवस्थित बनाउने कार्य गरिएको छ ।

विद्यालयमा १५ वटा सीसी क्यामेरा जडान गरिएपछि सुरक्षा, अनुशासन र शैक्षिक वातावरणमा सकारात्मक परिवर्तन आएको शिक्षकहरूको भनाइ छ । सिंहले प्रदेश सरकार र रंगेली नगरपालिकासँग समन्वय गरी करिब १० लाख रुपैयाँ बराबरको बजेटसमेत विद्यालयका लागि उपलब्ध गराएका छन् । भौतिक निर्माणका केही काम सुरु भए पनि अझै पूर्ण रूपमा सम्पन्न हुन बाँकी छ ।

विद्यालयको खेलमैदानमा वर्षौंदेखि रहेको ठूलो खाल्डोका कारण वर्षायाममा पानी जमेर खेलकुद तथा पठनपाठन प्रभावित हुने गरेको थियो । यसको समाधानका लागि पनि पहल गरिएको सिंहले बताए । हाल विद्यालयमा अति विपन्न तथा आर्थिक रूपमा कमजोर परिवारका चार सय विद्यार्थी अध्ययनरत छन् । यद्यपि, विद्यालयका केही पुराना भवन अझै जीर्ण अवस्थामा छन् । बर्खाको समयमा छानाबाट पानी चुहिने समस्या कायम रहेको शिक्षकहरूले बताएका छन् ।

शिक्षक अच्युत अधिकारीका अनुसार विद्यालयको दीर्घकालीन सुधारका लागि आफ्नै तलबबाट व्यक्तिगत लगानी गर्ने र निरन्तर पहल गर्ने नेतृत्व आफूले पहिलोपटक देखेको अनुभव गरेका छन् । यस्तो सक्रियताले शिक्षकहरूलाई थप जिम्मेवार र उत्तरदायी बन्न प्रेरित गरेको उनको भनाइ छ ।

प्रधानाध्यापक सिंहका अनुसार विद्यालयले लामो समयदेखि प्रयोग गर्दै आएको जग्गाको स्वामित्व स्पष्ट नभएको अवस्थामा आवश्यक प्रक्रिया पूरा गरी विद्यालयको नाममा कायम गरिएको छ । विद्यालयको नाममा अन्य स्थानमा दुई बिघा जग्गाको लालपुर्जा भए पनि हाल करिब १८ कट्ठा जग्गाबाट मात्र आम्दानी भइरहेको उनले जानकारी दिए । विद्यालयको पूर्वतर्फ रहेको करिब चार कट्ठा जग्गामा हरेक बुधबार र शनिबार हाटबजार लाग्ने गरेको छ । विद्यार्थीहरूका अनुसार त्यसबाट हुने भिडभाड र प्रदूषणले पठनपाठनमा असर पार्ने गरेको छ ।

रंगेली नगरपालिकाका प्रमुख प्रशासकीय अधिकृत प्रदीपकुमार शाहले चालु आर्थिक वर्षमा पार्वती माध्यमिक विद्यालयको नयाँ भवन निर्माणका लागि बजेट विनियोजन भइसकेको छ । आवश्यक प्रक्रिया पूरा भएपछि निर्माण कार्य सुरु हुने जानकारी उनले दिए ।

पछिल्ला दुई वर्षमा विद्यालयको भौतिक वातावरण, सरसफाइ, सुरक्षा, अनुशासन र व्यवस्थापनमा उल्लेखनीय सुधार आएको छ । प्रधानाध्यापकको सक्रिय नेतृत्व र व्यक्तिगत योगदानले विद्यालयप्रति समुदायको विश्वाससमेत बढाएको शिक्षणकहरु बताउँछन् । उनीहरुका अनुसार स्रोत साधनको अभावबीच पार्वती माध्यमिक विद्यालयले प्रतिबद्ध नेतृत्व, पारदर्शिता र व्यक्तिगत उत्तरदायित्वका माध्यमबाट विद्यालय सुधार सम्भव हुने सन्देश दिएको छ ।