नेकपा तेह्रथुमको एकता बैठकबाट २१५ सदस्यीय कमिटी घोषणा

तेह्रथुम । नेपाली कम्युनिस्ट पार्टी (नेकपा) तेह्रथुमको जिल्लास्तरीय एकता बैठकबाट २१५ सदस्यीय नयाँ जिल्ला कमिटीको घोषणा गरिएकाे छ ।

नेकपाका प्रदेश इन्चार्ज एवं काेशी प्रदेशका पूर्वमुख्यमन्त्री राजेन्द्र राईको उपस्थितिमा भएकाे बैठकले नयाँ कमिटी घाेषणा गरेकाे हाे । नयाँ कमिटीलाई शपथ ग्रहण गराइएको छ ।

सो कार्यक्रममा नेताहरूले वर्तमान सरकार जनविरोधी र निरंकुश हुँदै गएको आरोप लगाए । प्रमुख अतिथि राईले महँगी नियन्त्रण र सुकुम्बासी समस्या समाधानमा सरकार उदासिन रहेको बताउँदै जनताको अधिकार रक्षाका लागि वामपन्थी ध्रुवीकरण र संगठन सुदृढीकरणमा जोड दिए ।

प्रदेश सह-इन्चार्ज समर काफ्लेले संघीयतालाई प्रभावकारी बनाउन बहसको खाँचो रहेको बताए । प्रदेश संयोजक हर्कबहादुर नेम्बाङ ‘मिक्सो’ले आगामी निर्वाचनमा पार्टीलाई विजयी बनाउने गरी तयारीमा जुट्न कार्यकर्तालाई निर्देशन दिए ।

नेकपा (माओवादी केन्द्र) र नेकपा (एकीकृत समाजवादी) लगायत १० वामपन्थी घटकबीच गत २०८२ कात्तिक १९ मा एकता भई ‘तारा’ चुनाव चिन्हसहित नयाँ पार्टी गठन भएको थियो । सोही एकताको सन्देश गाउँ-गाउँसम्म पुर्‍याउन प्रदेशका १४ वटै जिल्लामा अभियान चलाइएको प्रदेश कमिटी सदस्य सानु कार्की बस्नेतले जानकारी दिए ।