विश्वकपमा स्पेन र फ्रान्स आमनेसामने हुँदै, तथ्यांकले कसलाई देखाउँछ बलियो ?

अमेरिका । फिफा विश्वकप २०२६ को पहिलो सेमिफाइनलमा युरोपका दुई फुटबल महाशक्ति स्पेन र फ्रान्स आमनेसामने हुँदैछन् । बुधबार बिहानका राति १२ः४५ बजेतिर अमेरिकाको टेक्सास राज्यस्थित अर्लिङ्टनको डलास स्टेडियममा हुने खेलसँगै विश्वकपको पहिलो फाइनलिस्टको टुंगो लाग्नेछ ।

विश्व फुटबलका दुई सफल टोलीबीचको भिडन्तलाई प्रतियोगिताकै सबैभन्दा ठूलो खेलमध्ये एक मानिएको छ । एकातिर दुईपटकको विश्वकप विजेता फ्रान्स छ भने अर्कोतर्फ सन् २०१० को विश्व विजेता तथा चारपटकको युरो च्याम्पियन स्पेन फाइनल यात्रा तय गर्ने लक्ष्यमा मैदान उत्रनेछन् ।

Advertisement

यस खेलमा सबैको ध्यान फ्रान्सका कप्तान किलियन एम्बाप्पे र स्पेनका युवा स्टार लामिन यामालतर्फ केन्द्रित हुनेछ । क्लब फुटबलमा ला लिगामार्फत एकअर्काविरुद्ध खेलिसकेका यी दुई खेलाडी अब विश्वकपको सेमिफाइनलजस्तो ठूलो मञ्चमा आमनेसामने हुँदैछन् ।

तथ्यांकले भने फ्रान्सलाई केही अघि देखाएको छ । खेल विश्लेषण गर्ने संस्था अप्टाको सुपरकम्प्युटरले निर्धारित ९० मिनेटभित्र फ्रान्सको जित्ने सम्भावना ४२.१ प्रतिशत आकलन गरेको छ । स्पेनको सम्भावना ३१.८ प्रतिशत रहेको छ । खेल अतिरिक्त समयमा पुग्ने सम्भावना २६.१ प्रतिशत रहेको उल्लेख गरिएको छ ।

यद्यपि, समग्र हेड–टु–हेड इतिहास हेर्दा स्पेनको पल्ला भारी देखिन्छ। अहिलेसम्म दुई टोलीबीच ३८ खेल भएका छन् । त्यसमध्ये स्पेनले १८ खेल जितेको छ भने फ्रान्सले १३ खेल आफ्नो पक्षमा पारेको छ । सात खेल बराबरीमा सकिएका छन् ।

पछिल्ला दुई प्रतिस्पर्धामा भने स्पेनले लगातार सफलता हात पारेको छ । २०२५ को यूईएफए नेसन्स लिग सेमिफाइनलमा स्पेनले ५–४ को रोमाञ्चक जित निकालेको थियो भने २०२४ को युरो सेमिफाइनलमा पनि २–१ ले पराजित गर्दै फाइनल पुगेको थियो ।

विश्वकप इतिहासमा भने यी दुई टोलीको भेट यसअघि एकपटक भएको छ । सन् २००६ को अन्तिम १६ को खेलमा फ्रान्सले स्पेनलाई ३–१ ले हराउँदै अर्को चरणमा स्थान बनाएको थियो ।

फ्रान्स यसपटक पनि आक्रमणमा निकै बलियो देखिएको छ । कप्तान एम्बाप्पे आठ गोल र तीन असिस्टसहित गोल्डेन बुटको दौडमा अग्रस्थानमा छन् । ओउस्मान डेम्बेलेले पाँच गोल गरेका छन् भने माइकल ओलिसे पाँच असिस्टका साथ उत्कृष्ट लयमा छन् । मिडफिल्डमा औरेलियन चुआमेनी र एडुआर्डो कामाभिङ्गा तथा रक्षामा इब्राहिमा कोनाते र विलियम सालिबाले टोलीलाई मजबुत बनाएका छन् ।

समूह चरणमा केही कमजोर देखिएको फ्रान्सको रक्षा नकआउट चरणमा भने निकै प्रभावशाली बनेको छ । टोलीले पछिल्ला तीन खेलमा लगातार क्लिन सिट राख्दै विपक्षीलाई गोल गर्ने अवसर दिएको छैन ।

स्पेनको सबैभन्दा ठूलो आशा भने उसको अनुशासित र संगठित खेल हो । प्रतियोगिताभर पाँच खेल खेल्दा स्पेनले एक गोल मात्र खाएको छ । मिकेल ओयारजाबाल चार गोलसहित टोलीका सर्वाधिक गोलकर्ता छन् भने मिकेल मेरिनोले नकआउट चरणमा निर्णायक गोल गर्दै टोलीलाई अघि बढाएका छन् ।

चोटबाट फर्किएका लामिन यामाल पनि विस्तारै आफ्नो लयमा देखिन थालेका छन् । यामालसँगै डानी ओल्मो, निको विलियम्स, पेड्री र फाबियन रुइजको उपस्थितिले स्पेनको आक्रमणलाई थप खतरनाक बनाएको छ ।

रणनीतिक रूपमा पनि यो खेल निकै रोचक हुने अपेक्षा गरिएको छ । फ्रान्सले एम्बाप्पेको गति र तीव्र काउन्टर अट्याकमा भर पर्ने सम्भावना छ भने स्पेनले बल आफ्नो नियन्त्रणमा राख्दै अवसर सिर्जना गर्ने शैली अपनाउने अनुमान गरिएको छ । विशेषगरी मिडफिल्डमा हुने प्रतिस्पर्धाले खेलको दिशा तय गर्न सक्ने विश्लेषण गरिएको छ ।

यस खेलको विजेताले विश्वकप २०२६ को फाइनलमा स्थान सुरक्षित गर्नेछ । दुवै टोली यसअघि उत्कृष्ट लयमा रहेकाले फुटबल समर्थकले उच्चस्तरीय र रोमाञ्चक प्रतिस्पर्धा हेर्न पाउने छन् ।