विश्वकप जित्ने टोलीका खेलाडीले पाउने भए फिफाको विशेष ‘च्याम्पियन रिङ’

न्युयोर्क । विश्व फुटबलको सर्वोच्च निकाय फिफाले २०२६ संस्करणको विश्वकप विजेता टोलीका खेलाडीलाई विशेष ‘च्याम्पियन रिङ’ (औंठी) प्रदान गर्ने भएको छ ।

अमेरिकामा विभिन्न व्यावसायिक खेलकुदका विजेता टोलीलाई स्मरणस्वरूप औंठी प्रदान गर्ने परम्परालाई पहिलोपटक फिफाले पनि विश्वकपसँग जोड्न लागेको हो । फिफाका अनुसार विश्व च्याम्पियन बन्ने टोलीका ३० सदस्यले यो विशेष औंठी प्राप्त गर्नेछन् । औंठीमा विश्वकप ट्रफीको डिजाइन राखिएको छ भने ब्यान्डमा विशेष लेखाइ पनि समावेश गरिएको छ ।

Advertisement

साथै, सीमित संस्करणका १ हजार ९ सय ९६ वटा औंठी सर्वसाधारणका लागि बिक्रीमा राखिने जनाइएको छ । सन् २०२६ को विश्वकपलाई लक्षित गर्दै औंठीमा ‘२०२६’ अंक पनि अंकित गरिएको छ ।

अमेरिकामा एनएफएलको सुपर बाउललगायत प्रमुख खेल प्रतियोगिताका विजेता खेलाडीलाई च्याम्पियन रिङ प्रदान गर्ने परम्परा लामो समयदेखि चल्दै आएको छ । फिफाले पनि त्यसैको प्रेरणामा विश्वकप विजेताका लागि यो नयाँ सम्मान सुरु गर्न लागेको हो ।

बीबीसीका अनुसार अर्जेन्टिना र स्पेनबीच हुने फाइनल खेलका प्रमुख अतिथि अमेरिकी राष्ट्रपति डोनाल्ड ट्रम्प रहनेछन् । उनले नै विजेता टोलीलाई विश्वकप ट्रफी हस्तान्तरण गर्ने कार्यक्रम रहेको छ ।

प्रतियोगिताका यसअघिका १ सय २ खेलमा ट्रम्प उपस्थित भएका थिएनन् । उनले अमेरिकी टोलीको खेल पनि मैदानमै पुगेर हेरेका थिएनन् ।