भारत पुगे प्रधानमन्त्रीका प्रमुख सल्लाहकार, परराष्ट्र मन्त्रालयले भन्यो, ‘औपचारिक जानकारी छैन’

काठमाडौं । प्रधानमन्त्री बालेन्द्र शाह (बालेन)का प्रमुख सल्लाहकार कुमार बेनको भारत भ्रमणका बारेमा परराष्ट्र मन्त्रालयले आफूलाई औपचारिक जानकारी नभएको जनाएको छ ।

शुक्रबार सिंहदरबारस्थित मन्त्रालयमा आयोजित नियमित पत्रकार सम्मेलनमा सञ्चारकर्मीले बेनको भारत भ्रमणका बारेमा प्रश्न उठाएपछि मन्त्रालयका प्रवक्ता लोकबहादुर पौडेल क्षेत्रीले मन्त्रालयसँग त्यससम्बन्धी कुनै औपचारिक विवरण नरहेको बताएका हुन् । ‘यस विषयमा मन्त्रालयलाई औपचारिक जानकारी प्राप्त भएको छैन,’ प्रवक्ता क्षेत्रीले भने ।

Advertisement

यसअघि विभिन्न सञ्चारमाध्यमले कुमार बेन जुलाइको पहिलो साता भारतको नयाँ दिल्ली पुगेको र त्यहाँ भारतका राष्ट्रिय सुरक्षा सल्लाहकार अजित डोभालसहित उच्च तहका अधिकारीसँग भेटवार्ता गरेको समाचार सार्वजनिक गरेका थिए । यद्यपि, उक्त भ्रमणका बारेमा नेपाल सरकारले हालसम्म कुनै औपचारिक जानकारी सार्वजनिक गरेको छैन । प्रधानमन्त्री सचिवालयले पनि भ्रमणको उद्देश्य, भेटघाट वा उपलब्धिका बारेमा कुनै धारणा सार्वजनिक गरेको छैन ।

स्रोतका अनुसार बेन पर्साको रक्सौल नाका हुँदै स्थलमार्गबाट भारत प्रवेश गरी नयाँ दिल्ली पुगेका थिए । तर, भ्रमण सरकारी जिम्मेवारीअन्तर्गत भएको हो वा व्यक्तिगत पहलमा भएको हो भन्ने विषय अझै स्पष्ट हुन सकेको छैन । परराष्ट्र मन्त्रालयले नै भ्रमणका बारेमा जानकारी नभएको बताएपछि प्रधानमन्त्रीका प्रमुख सल्लाहकारको भारत भ्रमणलाई लिएर थप जिज्ञासा र चासो बढेको छ ।