कप्तानगञ्ज घटना : सांसद साहद्वारा सुरक्षा अधिकारीहरूमाथि कारबाही माग

काठमाडौं । सुनसरीको देवानगञ्ज गाउँपालिका-३, कप्तानगञ्जमा भएको हिंसात्मक घटनामा सुरक्षा अधिकारीहरूको भूमिकामाथि छानबिन गरी निलम्बनसहित विभागीय कारबाही गर्न प्रतिनिधिसभा सदस्य दीपक कुमार साहले सरकारसँग माग गरेका छन् ।

सांसद साहले सोमबार गृहमन्त्री सुधन गुरुङलाई भेटेर साउने सोमबारको बोलबम यात्राका क्रममा साउन १० गते राति भएको झडपमा ओमप्रकाश मेहताको मृत्यु र आठ जना घाइते भएको घटनाप्रति गम्भीर ध्यानाकर्षण गराए । भेटका क्रममा उनले बुझाएको ध्यानाकर्षण पत्रमा घाइतेमध्ये अधिकांशलाई गोली लागेको र उनीहरूको विराटनगरका विभिन्न अस्पतालमा उपचार भइरहेको उल्लेख छ ।

Advertisement

घटनाले स्थानीय शान्ति, सामाजिक सद्भाव तथा सुरक्षामा गम्भीर असर पारेको भन्दै सांसद साहले स्थिति नियन्त्रणमा लिन स्थानीय प्रशासन र सुरक्षा निकायले जिम्मेवार भूमिका निर्वाह गर्न नसकेको गुनासो आएको बताए । उनले सुनसरीका प्रमुख जिल्ला अधिकारी, जिल्ला प्रहरी प्रमुख (एसपी) र जिल्ला प्रहरी कार्यालयका डीएसपीको भूमिकामाथि निष्पक्ष छानबिन गरी दोषी देखिए निलम्बनसहित कारबाही गर्न माग गरे ।

यस्तै घटनाको निष्पक्ष र पारदर्शी छानबिन गरी दोषीमाथि कडा कारबाही गर्न, पीडित परिवारलाई क्षतिपूर्ति दिन र घाइतेको निःशुल्क उपचारको व्यवस्था मिलाउन पनि उनले सरकारको ध्यानाकर्षण गराए । सांसद साहले भविष्यमा यस्ता घटना दोहोरिन नदिन सुरक्षा संयन्त्रलाई बलियो बनाउन, आवश्यक कानुनी सुधार गर्न र धार्मिक सहिष्णुता तथा सामाजिक सद्भाव कायम राख्न गृह मन्त्रालयसँग आग्रह गरे। उनले घटनाको सत्यतथ्य शीघ्र सार्वजनिक भई पीडितले न्याय पाउने विश्वास व्यक्त गरेका छन् ।