निर्मल पुर्जाको निधनमा प्रधानमन्त्री, ‘साहस अमर रहनेछ’

मुलुकी खबर

२०८३ श्रावण १६, शनिबार १७:०९

काठमाडौं । प्रधानमन्त्री बालेन्द्र शाहले पाकिस्तानको ब्रड पिक हिमालमा आएको हिमपहिरोमा परी विश्वकीर्तिमानी आरोही निर्मल पुर्जा ‘निम्सदाइ’ सहितका आरोहीहरूको निधनप्रति गहिरो दुःख व्यक्त गरेका छन्।

शनिबार सामाजिक सञ्जालमा लेख्दै प्रधानमन्त्री शाहले आरोहण केवल शिखर चुम्ने यात्रा मात्र नभएर साहस, अनुशासन, त्याग र मानवीय सीमालाई चुनौती दिने अदम्य आत्मविश्वासको सर्वोच्च अभिव्यक्ति भएको बताए। हिमालले धेरैलाई शिखरको गौरव दिने र कहिलेकाहीँ आफ्नै काखमा सधैँका लागि अँगालेर राख्ने भए पनि आरोहीहरू आफ्नो साहस र समर्पणका कारण इतिहासमा सधैँ अमर रहने उनको भनाइ छ।

पाकिस्तानको ८,०५१ मिटर अग्लो ब्रड पिकमा बिहीबार गएको हिमपहिरोमा परी पुर्जासहित ६ जना नेपाली र ४ जना विदेशी आरोहीको निधन भएको थियो। आरोहण आयोजक कम्पनी इलाइट एक्सपेडका अनुसार पुर्जाका भरपर्दा सहयोगी पुरबहादुर गुरुङ (युक्ता) र निमा शेर्पाको पनि दुर्घटनामा ज्यान गएको छ। मिङ्मा ग्याल्जे शेर्पा (मिङ्मा जी) र सिरबाज खानको टोलीले घटनास्थल पुगेर शव पहिचान गरेको थियो।

प्रधानमन्त्री शाहले दिवङ्गत आरोहीहरूको भौतिक यात्रा रोकिए पनि उनीहरूको साहस, समर्पण र योगदानको इतिहास सधैँ जीवित रहने उल्लेख गर्दै शोकसन्तप्त परिवारजन र शुभेच्छुकहरूप्रति हार्दिक समवेदना प्रकट गरेका छन्।

सन् २०१९ मा विश्वका ८,००० मिटरभन्दा अग्ला १४ वटै हिमाल ६ महिना ६ दिनमा चढेर कीर्तिमान राखेका पूर्वब्रिटिस गोर्खा सैनिक पुर्जाको साहसिक यात्रा नेटफ्लिक्स डकुमेन्ट्री ‘फोर्टीन् पिक्स: नथिङ इज इम्पोसिबल’ मार्फत विश्वभर चर्चित छ।