रुसको क्षेप्यास्त्र आक्रमण, १२ जनाको मृत्यु

एजेन्सी। युक्रेनको राजधानी किएभ र आसपासका क्षेत्रमा रुसले गरेको लामो दूरीको क्षेप्यास्त्र आक्रमणमा कम्तीमा १२ जनाको मृत्यु भएको छ। आक्रमणमा परि ३३ जना घाइते भएको युक्रेनी अधिकारीहरूले बिहीबार बताएका छन्।

पछिल्ला महिनाहरूमा रुस र युक्रेन दुवैले हवाई आक्रमण तीव्र बनाएपछि जारी युद्धमा सर्वसाधारणमाथिको जोखिम थप बढेको छ। किएभका मेयर भिटाली क्लिट्स्कोका अनुसार रातभर भएको उक्त आक्रमणबाट आवासीय क्षेत्र, गोदाम, स्वास्थ्य संस्था तथा शैक्षिक प्रतिष्ठानहरूमा क्षति पुगेको छ। यस्तै किएभ क्षेत्रको ब्रोभरी जिल्लामा एउटा औद्योगिक प्रतिष्ठानमा क्षति पुग्नुका साथै थप एक जनाको मृत्यु र अर्का एक घाइते भएको क्षेत्रीय गभर्नर तिमुर टाकाचेन्कोले बताएका छन्।

Advertisement

रुसी आक्रमणपछि छिमेकी मुलुक पोल्यान्डले युक्रेनसँगको सीमाक्षेत्रमा हवाई सुरक्षा प्रणाली सक्रिय पार्दै लडाकु विमान परिचालन गरेको छ। रोमानियाले पनि युक्रेनी सीमा नजिकै हवाई लक्ष्य पत्ता लागेपछि स्पेनका दुई लडाकु विमान र आफ्नै हेलिकप्टर परिचालन गरेको जनाएको छ। एउटा ड्रोन रोमानियाको हवाई क्षेत्रमा प्रवेश गरी तुल्चाको निर्जन क्षेत्रमा खसेको थियो।

यसैबिच, रुसले युक्रेनतर्फबाट मस्कोतर्फ पठाइएका करिब २५० ड्रोन नियन्त्रणमा लिइएको जनाएको छ। मस्कोका मेयर सर्गेई सोब्यानिनका अनुसार तीमध्ये २८ वटा ड्रोन मस्को क्षेत्रमै नष्ट गरिएको थियो। मस्कोलाई युद्ध अन्त्यका लागि वार्तामा ल्याउने दबाबस्वरूप युक्रेनले पनि पछिल्ला महिनाहरूमा रुसमाथि प्रतिशोधात्मक आक्रमण तीव्र पार्दै लगेको छ।