नेतृत्व परिवर्तन सामाजिक सञ्जालले होइन, महाधिवेशनले तय गर्छः शंकर पोखरेल

विराटनगर । नेकपा (एमाले) का महासचिव शंकर पोखरेलले पार्टीको नेतृत्व परिवर्तन संस्थागत प्रक्रिया र महाधिवेशनबाट मात्र सम्भव रहेको बताएका छन् ।

विराटनगरमा आयोजित पत्रकार भेटघाटमा बोल्दै महासचिव पोखरेलले सामाजिक सञ्जालको चर्चाका भरमा नेतृत्व परिवर्तन नहुने स्पष्ट पारे । ‘हामी संस्थागत प्रक्रियाभन्दा बाहिरबाट नेतृत्व परिवर्तन गर्ने पक्षमा छैनौँ,’ पोखरेलले भने, ‘एमालेको महाधिवेशन कहिले हुने र नेतृत्व कसले लिने भन्ने विषय सामाजिक सञ्जालले होइन, पार्टीको केन्द्रीय कमिटीले निर्णय गर्ने कुरा हो ।’

Advertisement

महासचिव पोखरेलले पार्टीमा सुदृढीकरण, सुधार र कार्यकर्ताको मनोबल उकास्ने रणनीति  आवश्यक रहेको बताए । शक्ति राष्ट्रहरूसँग सन्तुलित कूटनीतिक सम्बन्ध राख्न सरकारले काम गर्न नसकेको बताउँदै, उनले भने, ‘अहिलेका प्रधानमन्त्री अन्य राजनीतिक दलहरूसँग छलफल, भेटघाट र संवाद गर्ने पक्षमा नरहेकाले पनि गम्भीर आशंका पैदा भएको छ । पार्टी नेता नै संसदीय दलको बैठकमा सहभागी नहुनुले मुलुक र लोकतन्त्रको भविष्यप्रति नै आशंका पैदा भएको छ ।’

प्रधानमन्त्रीको व्यवहारका कारण लोकतन्त्र र राष्ट्र नै संकटमा परेको दाबी गर्दै उनले सरकार जनअपेक्षा अनुसार चल्न नसकेको आरोप लगाए । ‘वर्तमान सरकार जनादेशबाट आएको भए पनि जनताको भरोसा बन्न सकेको छैन,’ उनले भने, ‘प्रधानमन्त्री स्वयं लोकतन्त्रप्रति प्रतिबद्ध देखिनुहुन्न ।’

महासचिव पोखरेलले वर्तमान सरकारको कार्यशैलीप्रति आलोचना गर्दै मुलुकमा बढ्दै गएका हत्या र गोली प्रहारका घटनाको जिम्मेवारी सरकारले लिनुपर्ने बताए । विगतमा भएका साना घटनामा पनि सरकारलाई दोषी देखाउने भाष्य निर्माण गरिएको स्मरण गराउँदै उनले अहिले भइरहेका असुरक्षाका घटनामा सरकार किन जिम्मेवार नहुने भन्दै प्रश्न गरे ।

मुलुकको आर्थिक अवस्थाका बारेमा चर्चा गर्दै पोखरेलले नयाँ सरकार गठनपछि व्यवसायीहरू सन्त्रासमा रहेको र लगानीको वातावरण खलबलिएको बताए । बैंकको ब्याजदर घटे पनि लगानी बढ्न नसकेका कारण मुलुक गम्भीर वित्तीय संकटतर्फ उन्मुख भइरहेको उनले बताए ।