बाढीपीडितका लागि एमालेले १ करोड २० लाख जुटाउने

काठमाडौं । नेकपा (एमाले) का अध्यक्ष केपी शर्मा ओलीले बाढीपीडितका लागि पार्टीले कम्तीमा एक करोड २० लाख रुपैयाँ जुटाएर सहयोग गर्ने बताएका छन् । आज (सोमबार) एमाले राजधानी प्रदेश कमिटीबाट उपलब्ध राहत सामग्री तथा सहयोग बुझ्दै अध्यक्ष ओलीले पार्टीको केन्द्रीय कोषबाट समेत रकम खर्च गर्ने बताएका हुन् ।

‘राजधानी र बागमती प्रदेशले १०–१० लाख गरी २० लाख रुपैयाँ बुझाउनुभएको छ। सबै गरेर एक करोड २० लाख संकलन गर्छौं,’ ओलीले भने, ‘पार्टीको केन्द्रीय कोषबाट कम्तीमा त्यो खर्च गर्छौं ।’ तर, संकलित रकम आफैँ पीडितसमक्ष पुर्‍याउने कि सरकारको प्रधानमन्त्री दैवीप्रकोप उद्धार तथा राहत कोषमा जम्मा गर्ने भन्नेमा भने अन्योल रहेको उनले बताए ।

Advertisement

‘सरकारकहाँ पुर्‍याए कोषमा परिराख्या छ। पीडितले पानी खान नपाएर ओठमुख सुकेका छन् । त्यसकारण हाम्रो अगाडि एउटा गम्भीर प्रश्न छ– साँच्चै पीडितकहाँ पुर्‍याउने कि सरकारको कोषमा देखाउने ?’ उनले भने । सरकारको कोषमा रकम जम्मा नगरे एमालेले सहयोग नगरेको भन्ने चर्चा चल्न सक्ने भन्दै ओलीले आफूहरू त्यसमा पनि सचेत रहेको बताए ।

‘एउटा चर्चा चल्छ, सरकारको कोषमा देखिएन भने अरूले कोषमा पठाए, एमालेले पठाएन भन्ने,’ उनले भने । प्रधानमन्त्री दैवीप्रकोप उद्धार तथा राहत कोषलाई बलियो बनाउन मात्र पैसा आवश्यक नरहेको उल्लेख गर्दै ओलीले उक्त कोष पनि अन्ततः विपद् प्रभावितलाई राहत पुर्‍याउनकै लागि बनाइएको बताए ।

‘पीडितकहाँ कुन माध्यमबाट छिटोछरितो ढंगले यथार्थ पीडितकहाँ राहत पुग्छ, हामी त्यही बाटो पुर्‍याउँछौं,’ उनले भने । एमालेले विपद्को उद्धार तथा राहतमा सक्दो प्रयास गरिरहेको र आगामी दिनमा पनि सहयोग जारी राख्ने ओलीले बताए । उनले विपद्को समयमा सबैलाई दिल खोलेर सहयोग गर्न आग्रह गरे । विपद् प्रभावितको उद्धार तथा राहतमा एमालेले सरकारसँग समन्वय गरेरै काम गर्न चाहेको पनि अध्यक्ष ओलीले बताए ।