विद्यार्थीका चुनौतीलाई पर्दामा उतार्दै ‘संघर्ष’को विशेष प्रदर्शन

Share this
663shares
मुलुकी खबर
मुलुकी खबर
clock२०८३ असोज १८, आइतबार ०७:१३

झापा । विद्यार्थी जीवनका समस्या, पारिवारिक अवस्थाको प्रभाव र सफलताका लागि आवश्यक मेहनतलाई केन्द्रमा राखेर निर्माण गरिएको चलचित्र ‘संघर्ष’को शनिबार राजगढस्थित एभरेस्ट डिजिटल सिनेमा हलमा विशेष प्रदर्शन गरिएको छ ।

पितमकुमार धमलाको लेखन तथा निर्देशनमा बनेको चलचित्रले विद्यार्थीको दैनिकीसँग जोडिएका यस्ता विषय उठाएको छ । जसले उनीहरूको भविष्य र व्यक्तित्व निर्माणमा प्रत्यक्ष प्रभाव पार्छन् ।

मोबाइलको बढ्दो लत, विद्यालयमा हुने बुलिङ, शिक्षक र अभिभावकको भूमिका तथा विद्यार्थीबीच देखिने व्यवहारगत भिन्नतालाई चलचित्रले कथाको माध्यमबाट उजागर गरेको छ । एउटै कक्षामा पढ्ने विद्यार्थीको पारिवारिक पृष्ठभूमि फरक हुँदा उनीहरूको शैक्षिक अवस्था र आचरणमा पर्ने प्रभावलाई पनि कथामा जोडिएको छ ।

चलचित्रकी मुख्य पात्र गीताको संघर्षमार्फत आर्थिक अभावलाई सफलताको अवरोधका रूपमा लिन नहुने सन्देश दिइएको छ । मिहिनेत, अनुशासन र निरन्तर प्रयासले लक्ष्य हासिल गर्न सकिने भाव चलचित्रले बोकेको छ । त्यस्तै, बालबालिकालाई आवश्यकताभन्दा बढी सुविधा र स्वतन्त्रता दिँदा त्यसले उनीहरूको अध्ययन तथा व्यवहारमा नकारात्मक असर पार्न सक्ने पक्षलाई समेत कथामा समेटिएको छ ।

बाल कलाकार कृषा भण्डारी मुख्य भूमिकामा रहेको चलचित्रमा राजु खरेल, राज लावती, अनुष्का ढुंगाना, अनुभव खापुङ, रिदम ढकाल, दीपा पोखरेल र तुलसी मिश्रलगायत कलाकारले अभिनय गरेका छन् । चलचित्रको पटकथा तथा संवाद मञ्जिल अधिकारीले लेखेका हुन् ।

राज लावतीले नृत्य निर्देशन, सुवास लिम्बूले छायांकन तथा सम्पादन, राजु खरेलले उत्पादन व्यवस्थापन र विष्णु कार्कीले मेकअपको जिम्मेवारी निर्वाह गरेका छन् । चलचित्रका गीतमा दिनेशराज शर्मा र डा. कुमार सुवेदीका शब्द रहेका छन् ।

प्रदर्शनपछि दर्शकले विद्यार्थीमा बढ्दो मोबाइल प्रयोग र त्यसले निम्त्याएका समस्यालाई चलचित्रले प्रभावकारी रूपमा उठाएको प्रतिक्रिया दिएका थिए । मनोरञ्जनसँगै विद्यार्थी, शिक्षक र अभिभावकलाई सोच्न बाध्य पार्ने विषयवस्तु चलचित्रमा रहेको उनीहरूको भनाइ थियो ।

बाह्रदशी गाउँपालिकाकी उपाध्यक्ष शान्तादेवी शिवाकोटी खरेलले स्थानीय कलाकारको सहभागितामा ग्रामीण परिवेशका विषयलाई चलचित्रमा समेटिनु प्रशंसनीय भएको बताइन् । स्थानीयस्तरमै चलचित्र निर्माण हुनु र प्रतिभाले आफ्नो क्षमता देखाउने अवसर पाउनु सकारात्मक भएको उल्लेख गर्दै उनले स्थानीय विषयवस्तुमा आधारित चलचित्र निर्माणलाई निरन्तरता दिनुपर्नेमा जोड दिइन् ।

तपाइको प्रतिक्रिया
अपांगता समावेशी विकासमा सरकारी प्रयास पर्याप्त भएनन्, कार्यान्वयनमै चुनौती
बेलबारीमा बाँसघारीभित्र जुवाखाल, प्रहरीले हान्यो छापा
निर्माण व्यवसायी महासंघ कोशीको अध्यक्षमा केशरकुमार बुढाथोकीको उम्मेदवारी, यस्तो छ प्यानल
प्रधानमन्त्रीका प्रमुख राजनीतिक सल्लाहकार बेनविरुद्ध प्रहरीमा जाहेरी
प्रहरीले ओलीको दाबी खण्डन गर्दै भन्यो, ‘कसैलाई थुन्ने अभिव्यक्ति दिएको छैन’
कांग्रेस विभाजित भइसकेको लेखकको स्वीकारोक्ति
झापादेखि कञ्चनपुरसम्मका किसानबाट डेढ लाख क्विन्टल धान किन्ने तयारी
‘गृहमन्त्रीकी आमा’ भन्दै भिडियो पोस्ट गर्ने तीन जना पक्राउ
विराटनगरमा स्व. गोल्छाको स्मृतिमा उद्योगी–व्यवसायीले गरे सम्मान तथा सहयोग
ईनम सापकोटा प्रकरणमा अप्रमाणित सूचना सार्वजनिक नगर्न प्रहरीको आग्रह
© 2024 Muluki Khabar. All Rights Reserved. Design & Develop By: Indesign Media Pvt. Ltd.