कांग्रेस महाधिवेशनमा दाहाल, रवि, भट्टराईसहित शीर्ष नेताको जमघट

काठमाडौं । नेपाली कांग्रेसको १५ औँ महाधिवेशनमा विभिन्न राजनीतिक दलका शीर्ष नेता तथा प्रतिनिधिहरू सहभागी भएका छन् ।

महाधिवेशनमा नेकपाका संयोजक पुष्पकमल दाहाल, राष्ट्रिय स्वतन्त्र पार्टी (रास्वपा)का सभापति रवि लामिछाने, पूर्वप्रधानमन्त्री डा. बाबुराम भट्टराई तथा नेकपा एमालेका महासचिव शंकर पोखरेल पुगेका छन् ।

त्यस्तै, राष्ट्रिय प्रजातन्त्र पार्टी (राप्रपा) का अध्यक्ष राजेन्द्र लिङ्देन, श्रम संस्कृति पार्टीका महासचिव आरेन राई, नागरिक उन्मुक्ति पार्टीका संरक्षक रेशम चौधरी र जनता समाजवादी पार्टी (जसपा) नेपालका सहअध्यक्ष शरतसिंह भण्डारीलगायत नेताहरू पनि महाधिवेशनमा सहभागी भएका छन् ।

यद्यपि, नेकपा एमालेका अध्यक्ष केपी शर्मा ओली र नेपाली कांग्रेसका निवर्तमान सभापति शेरबहादुर देउवा भने महाधिवेशनमा उपस्थित भएका छैनन् ।

महाधिवेशनको निर्धारित तालिकाअनुसार आइतबार उद्घाटन सत्र आयोजना हुँदैछ। असोज १९ र २० गते बन्द सत्र तथा असोज २१ र २२ गते निर्वाचन प्रक्रिया सञ्चालन हुनेछ।

देशभर निरन्तर वर्षा भएपछि असोज १६ गतेका लागि तय गरिएको कांग्रेसको १५औँ महाधिवेशन केही दिन ढिला गरी आजदेखि सुरु भएको हो ।