जितिया मनाउन गएका दुई किशोरीको डुबेर मृत्यु

बारा । जितिया पर्वको अवसरमा पोखरीमा नुहाउन गएका बाराका दुई किशोरीको डुबेर मृत्यु भएको छ ।

बाराको देवताल गाउँपालिका–६ जबकास्थित माछा पोखरीमा डुबेर रौवाहीका १४ वर्षीया निशा पटेल र चाँदनी पटेलको मृत्यु भएको हो । शनिबार साँझ अभिभावकसँगै जितिया पर्व मनाउने क्रममा पोखरीमा पुगेका दुवै किशोरी अचानक पानीमा डुबेर बेपत्ता भएका थिए । उनीहरू बेपत्ता भएको खबरपछि प्रहरी र स्थानीयवासीले पोखरीमा खोजी थालेका थिए ।

अस्थायी प्रहरी पोष्ट बेनौलीबाट खटिएको प्रहरी टोलीले स्थानीयको सहयोगमा खोजी गर्ने क्रममा पोखरीको उत्तरतर्फबाट दक्षिणतर्फ दुवै किशोरीलाई मृत अवस्थामा फेला पारेको बारा प्रहरीका निमित्त सूचना अधिकारी इन्स्पेक्टर राजाबाबु ठाकुरले बताए ।

घटनापछि दुवैको शव परीक्षणका लागि प्रादेशिक अस्पताल कलैया पठाइएको छ । घटनाको प्रहरीले थप अनुसन्धान गरिरहेको छ ।