रंगेलीका विद्यार्थीलाई बीमासम्बन्धी सचेतना

विराटनगर । नेपाल बीमा प्राधिकरण, कोशी प्रदेश कार्यालय विराटनगरले रंगेलीस्थित रत्न माध्यमिक विद्यालयका विद्यार्थी तथा शिक्षकसँग बीमासम्बन्धी छलफल तथा अन्तरक्रिया कार्यक्रम सम्पन्न गरेको छ ।

विद्यार्थी समाज रूपान्तरणका संवाहक भएकाले उनीहरूमार्फत अभिभावक हुँदै समुदायस्तरसम्म बीमासम्बन्धी चेतना फैलाउने उद्देश्यले कार्यक्रम सञ्चालन गरिएको प्राधिकरणले जनाएको छ । प्राधिकरणले बीमासम्बन्धी जानकारी र सचेतना समुदायस्तरसम्म पुर्‍याउन यस्ता कार्यक्रम गर्दै आएको छ ।

नेपाल बीमा प्राधिकरण, कोशी प्रदेश कार्यालयका प्रमुख राजेन्द्र महर्जनले बीमालाई कागजी सम्झौताका रूपमा मात्र नभई जीवन र सम्पत्तिको आर्थिक सुरक्षा कवचका रूपमा बुझाउन यस्ता लक्षित कार्यक्रम प्रभावकारी हुने बताए। उनले विद्यालय तहदेखि नै बीमाबारे जानकारी दिने कार्यक्रमलाई प्राधिकरणले प्राथमिकता दिँदै आएको जानकारी दिए ।

कार्यक्रममा प्राधिकरणका प्रथम सहायक मिलन पोखरेलले बीमाको महत्त्व, आवश्यकता तथा आर्थिक क्षतिबाट जोगिन बीमाले खेल्ने भूमिकाबारे विद्यार्थी र शिक्षकलाई प्रशिक्षण दिएका थिए । अन्तरक्रियामा देशको समग्र वित्तीय प्रणालीमा बीमा क्षेत्रको योगदान, बीमाको अवधारणा, जीवन तथा निर्जीवन बीमाका प्रकार र तिनको उपयोगिताबारे जानकारी गराइएको थियो ।

कार्यक्रमपछि विद्यार्थीका लागि बीमासम्बन्धी खुला प्रश्नोत्तरसमेत सञ्चालन गरिएको थियो। त्यस क्रममा विद्यार्थीहरूले बीमाबारे आफ्ना जिज्ञासा र द्विविधा राखेका थिए । प्रदेश प्रमुख महर्जनका अनुसार विद्यालय तहदेखि नै विद्यार्थीलाई व्यावहारिक वित्तीय ज्ञान दिन सके उनीहरू भविष्यमा जिम्मेवार नागरिक बन्नुका साथै परिवार र समुदायलाई समेत आर्थिक सुरक्षाका उपाय अपनाउन प्रेरित गर्न सक्छन् ।