विभिन्न जिल्लामा भारी वर्षा

Share this
701shares
मुलुकी खबर
मुलुकी खबर
clock२०८३ असोज २४, शनिबार ०८:१४
कोशी, बागमती र गण्डकीमा ‘धेरै भारी’ वर्षाको सम्भावना 

काठमाडौं । पछिल्लो २४ घण्टामा देशका विभिन्न जिल्लामा भारी वर्षा भएको छ । मौसम पूर्वानुमान महाशाखाका अनुसार कास्की, दार्चुला, संखुवासभा, सर्लाही, काठमाडौं, सिन्धुपाल्चोक र काभ्रेका विभिन्न वर्षा मापन केन्द्रमा भारी वर्षा रेकर्ड गरिएको हो ।

महाशाखाको विवरणअनुसार कास्कीको घलेखर्कमा सबैभन्दा बढी ७३.८ मिलिमिटर वर्षा मापन भएको छ । त्यस्तै, दार्चुलाको धरमपानीमा ६४.३, संखुवासभाको चैनपुरमा ६२.८ र सर्लाहीको नवलपुरमा ६१.२ मिलिमिटर वर्षा भएको छ ।

सर्लाहीकै मानुसमारा केन्द्रमा ५३.४ मिलिमिटर वर्षा मापन हुँदा काठमाडौंको कलंकीमा ५१.२ मिलिमिटर वर्षा भएको छ । सिन्धुपाल्चोकको बौनीपाटी र काभ्रेको रोशी केन्द्रमा समान ५०.४ मिलिमिटर वर्षा रेकर्ड भएको महाशाखाले जनाएको छ ।

मौसम विज्ञानको मापदण्डअनुसार २४ घण्टामा ५० देखि १०० मिलिमिटरसम्म वर्षा हुनुलाई भारी वर्षा मानिन्छ । यस अवधिमा अन्य धेरै जिल्लामा पनि वर्षा भएको छ । ती स्थानमा १० देखि ५० मिलिमिटरसम्म वर्षा मापन भएकाले मध्यम वर्षाको अवस्था रहेको छ ।

महाशाखाका अनुसार २४ घण्टामा १०० देखि २०० मिलिमिटरसम्म वर्षा भएमा धेरै भारी र २०० मिलिमिटरभन्दा बढी वर्षा भएमा अति भारी वर्षा मानिन्छ । शनिबार पनि देशका केही स्थानमा मध्यम वर्षा हुने सम्भावना रहेको महाशाखाले जनाएको छ ।

तपाइको प्रतिक्रिया
© 2024 Muluki Khabar. All Rights Reserved. Design & Develop By: Indesign Media Pvt. Ltd.