तरकारीको आडमा गाँजा तस्करी : मोरङमा ५७० किलो बरामद, पिकअप छाडेर चालक फरार

विराटनगर । पिकअप गाडीमा लोड गरिएको तरकारीभित्र लुकाएर मोरङबाट भारत कटाउन लागिएको ठूलो परिमाणको गाँजा सशस्त्र प्रहरीले बरामद गरेको छ । यसले तरकारी ओसारपसारको आडमा गाँजा तस्करी गरिएको प्रष्ट भएको सशस्त्रको भनाइ छ ।

जहदा गाउँपालिकाबाट सशस्त्र प्रहरीले ५७० किलो गाँजा बरामद गरेको हो । तरकारी (स्कुस र बन्दाकोपी) बोकेको पिकअप भ्यानभित्र लुकाएर ल्याइएको अवस्थामा शनिबार राति ११ बजेतिर गाँजा बरामद गरिएको सशस्त्र प्रहरी बल मोरङका प्रमुख एसपी गेहेन्द्रबहादुर भण्डारीले बताए ।

उनका अनुसार सशस्त्र प्रहरी बल नेपाल बोर्डर आउट पोस्ट (बीओपी) नोचाबाट खटिएको टोलीले जहदा गाउँपालिका–४ स्थित रामचोकमा शंकास्पद अवस्थामा रहेको प्र १–०१–०० च ७४२२ नम्बरको महेन्द्र पिकअप भ्यानलाई रोक्न खोजेको थियो । सशस्त्र प्रहरीलाई देखेपछि चालक गाडी छाडेर फरार भएका थिए ।

त्यसपछि गाडी नियन्त्रणमा लिएर खानतलासी गर्दा तरकारीको बीचमा लुकाएर राखिएको १९ पोका गाँजा फेला परेको एसपी भण्डारीले बताए । बरामद गाँजा तौल लिँदा ५७० किलो भएको उनको भनाइ छ ।

भण्डारीका अनुसार बरामद गाँजा र पिकअप भ्यानलाई आवश्यक अनुसन्धान एवं कारबाहीका लागि नेपाल प्रहरीको जिम्मा लगाइएको छ । प्रहरीले फरार रहेका पिकअप चालकको खोजी तीव्र पारेर घटनाको थप अनुसन्धान अघि बढाएको छ ।

प्रहरीका अनुसार गाँजा कसले र कहाँबाट ल्याएको हो भन्ने यकिन छैन । यद्यपि, नेपालबाट भारत कटाउनलाई तरकारीभित्र लुकाएर गाँजा ल्याइएको प्रहरीको भनाइ छ । तरकारी र गाँजा लोड गरिएको पिकअप नेपाल–भारत सीमानजिकै पुगेपछि सशस्त्रले फेला पारेको थियो ।