काठमाडौंमा स्वीप अपरेसन: ९८ जना पक्राउ

काठमाडौं । काठमाडौं उपत्यकामा शान्ति सुरक्षा कायम गर्दै आपराधिक गतिविधि नियन्त्रण गर्ने उद्देश्यले प्रहरीले सञ्चालन गरेको स्वीप अपरेसनमा ९८ जना पक्राउ परेका छन् ।

जिल्ला प्रहरी परिसर काठमाडौंका अनुसार असोज २६ गतेदेखि २७ गते बिहान ६ बजेसम्म सञ्चालित अभियानका क्रममा उनीहरूलाई नियन्त्रणमा लिइएको हो ।

प्रहरीका अनुसार पक्राउ पर्नेमा सार्वजनिकस्थलमा होहल्ला गर्ने, दुर्व्यवहार तथा हातपात गर्ने, चोरी, लुटपाट, बिचौलियाको गतिविधि र गुण्डागर्दीजस्ता कार्यमा संलग्न व्यक्तिहरू रहेका छन् ।

त्यसैगरी, अदालतबाट सजाय तोकिएका नौ जना कसुरदार र विभिन्न मुद्दामा फरार रहेका सात जना प्रतिवादीसमेत पक्राउ परेका छन् ।

काठमाडौंका विभिन्न स्थानमा सञ्चालन गरिएको अभियानले सार्वजनिक सेवा प्रवाह हुने कार्यालय, यातायातका साधन तथा अन्य सार्वजनिकस्थलमा हुने अवाञ्छित गतिविधि नियन्त्रण गर्न सहयोग पुग्ने प्रहरीले जनाएको छ ।

पक्राउ परेका सबैमाथि आवश्यक अनुसन्धान भइरहेको जिल्ला प्रहरी परिसर काठमाडौंले जानकारी दिएको छ ।