बाल संसार स्कुलमा टीका, जमरा र दक्षिणासहित दसैँको शुभकामना आदानप्रदान

विराटनगर । नेपाली संस्कृति, परम्परा र चाडपर्वको महत्वबारे विद्यार्थीलाई व्यवहारिक ज्ञान दिने उद्देश्यले विराटनगरको बाल संसार इंग्लिस बोर्डिङ स्कुलले टीका, जमरा र दक्षिणा प्रदान गर्दै दसैँको शुभकामना आदानप्रदान गरेको छ ।

विद्यालयले किताबी ज्ञानसँगै नेपाली मौलिक संस्कार र परम्पराबारे विद्यार्थीलाई जानकारी गराउने उद्देश्यले कार्यक्रम आयोजना गरेको हो। कार्यक्रममा विद्यार्थीलाई दसैँको टीका, जमरा र दक्षिणा प्रदान गरिएको थियो।
विद्यालयका प्रिन्सिपल खड्ग राईले विद्यार्थीलाई हरेक चाडपर्वको महत्त्व र त्यससँग जोडिएका संस्कारबारे व्यवहारिक ज्ञान दिँदै आएको बताए । उनका अनुसार चाडपर्वका माध्यमबाट नेपाली संस्कृति र परम्पराबारे जानकारी गराउनुका साथै विद्यार्थीमा असल संस्कार विकास गर्न विद्यालयले यस्ता गतिविधिलाई प्राथमिकता दिँदै आएको  छ।

यसैगरी, विद्यार्थीमा सानै उमेरदेखि बचत गर्ने बानीको विकास गराउने उद्देश्यले विद्यालयले खुत्रुकेसमेत वितरण गरेको छ । खुत्रुकेमार्फत नियमित बचत गर्ने बानी बसाल्नुका साथै पैसाको महत्त्व बुझ्न विद्यार्थीलाई सहयोग पुग्ने विद्यालयले अपेक्षा गरेको छ ।

कक्षा ५ सम्म सञ्चालनमा रहेको स्कुलले शैक्षिक ज्ञानसँगै विद्यार्थीको व्यवहारिक सीप, नैतिक संस्कार र जीवनोपयोगी बानीको विकासमा जोड दिँदै आएको छ।