एभरेस्टका मन्टेश्वरीका विद्यार्थीले व्यवहारमै सिके चाडपर्वका संस्कार

विराटनगर । विराटनगर–५ स्थित एभरेस्ट माध्यमिक विद्यालयको मन्टेश्वरी तहका विद्यार्थीले नेपाली चाडपर्व, संस्कृति र संस्कारको महत्त्व बुझाउने उद्देश्यले विविध पर्वलक्षित विशेष कार्यक्रम प्रस्तुत गरेका छन् ।

दसैँ, तिहार, नेपाल सम्वत्, म्ह पूजा र छठलगायतका पर्वलाई लक्षित गरी आयोजित कार्यक्रममा प्ले ग्रुपदेखि कक्षा १ सम्मका २५० जना विद्यार्थी सहभागी भएका थिए । पाठ्यक्रममा चाडपर्वबारे उल्लेख भए पनि तिनलाई व्यवहारमा कसरी मनाइन्छ भन्ने ज्ञान दिन कार्यक्रम आयोजना गरिएको विद्यालयले जनाएको छ ।

कार्यक्रममा विद्यार्थीलाई नवरात्रिमा पूजा गरिने दुर्गा माताका विभिन्न स्वरूपमा सजाएर पूजा गरिएको थियो । दसैँमा गरिने पूजा आराधना तथा मनोरञ्जनात्मक गतिविधिमा समेत विद्यार्थी सहभागी भएका थिए । त्यसैगरी म्ह पूजाको विधि, तिहारमा गरिने विभिन्न संस्कार र छठ पर्वका गतिविधि विद्यार्थीले प्रस्तुत गरेका थिए ।

विद्यालयका प्रिन्सिपल टीकाराम पुरीले चाडपर्व नेपाली समाजका संस्कृति र संस्कारका अभिन्न अंग भएकाले तिनको संरक्षणका लागि बालबालिकालाई सानैदेखि व्यवहारिक ज्ञान दिन आवश्यक रहेको बताए । पूर्वीय दर्शनमा आधारित नेपाली संस्कार र संस्कृतिलाई नयाँ पुस्तामाझ हस्तान्तरण गर्ने उद्देश्यले कार्यक्रम आयोजना गरिएको उनले जानकारी दिए ।

‘हाम्रो कला, धर्म र संस्कृति जोगाउनुपर्छ । त्यसका लागि व्यवहारिक ज्ञान दिनुपर्छ भन्ने उद्देश्यले प्रयोगात्मक रूपमा प्रदर्शन गरिएको हो,’ उनले भने ।

विद्यालयले शिक्षासँगै सीप, संस्कार र प्रविधिलाई जोडेर अघि बढिरहेको उल्लेख गर्दै पुरीले किताबी ज्ञानलाई व्यवहारमा उतार्ने अभ्याससमेत गराउँदै आएको बताए । बालबालिकालाई सानैदेखि आफ्ना कला, धर्म, संस्कृति र संस्कारबारे सिकाउनु आवश्यक रहेको उनको भनाइ थियो ।

मन्टेश्वरी तहमा गरिएको कार्यक्रम प्रभावकारी देखिएकाले आगामी दिनमा प्राथमिक तहका विद्यार्थीलाई समेत चाडपर्वलक्षित कार्यक्रममार्फत सहभागी गराइने उनले जानकारी दिए ।

कार्यक्रममा विद्यालयका भाइस प्रिन्सिपल कुन्दन पुरी, नेपाल पत्रकार महासंघ कोशीका कोषाध्यक्ष सुदीप कोइराला, विद्यालय प्रशासन प्रमुख एञ्जिला कोइराला र अतिरिक्त क्रियाकलाप इन्चार्ज सुधा डंगोललगायतको उपस्थिति थियो ।