एन्फाको अर्ली इलेक्सन गर्ने निर्णय बदर, नियमित निर्वाचन प्रक्रिया अघि बढाउने

काठमाडौं । अखिल नेपाल फुटबल संघ (एन्फा) ले संघको विधानअनुसार नियमित निर्वाचन प्रक्रिया अघि बढाउने निर्णय गरेको छ । एन्फा मुख्यालय सातदोबाटोमा शनिबार बसेको बहुमत सदस्यको बैठकले १६ पुसमा गरिएको अर्ली इलेक्सन गर्ने निर्णय बदर गरेको हो ।

बैठकले विधानमा व्यवस्था भएबमोजिम नियमित निर्वाचन प्रक्रिया अघि बढाउने निर्णय गरेको एन्फाका निमित्त महासचिव दामोदर भट्टराईले जानकारी दिए । निर्वाचन प्रक्रियाबाट चयन हुने नयाँ नेतृत्वका लागि आवश्यक स्वीकृति, एन्फाको निलम्बन फुकुवा, संघको स्वच्छता र संस्थाको स्वाधीन निर्णय कार्यान्वयनका लागि बैठकले सम्बन्धित सबै पक्षसँग अनुरोध गरेको छ ।

बैठकले आगामी माघमा एन्फा यू–१५ फेस्टिभल आयोजना गर्ने निर्णय गर्दै उपाध्यक्ष विराटजंग शाहीलाई संयोजक तोकेको छ । लिखित रूपमा माग गरिएको विवरणबारे अध्यक्ष र महासचिवले कार्यसमितिलाई जवाफ नपठाएको भन्दै तीन दिनभित्र सत्यतथ्य विवरण पेस गर्न पुनः अनुरोध गर्ने निर्णय पनि भएको छ । निमित्त महासचिव भट्टराईलाई एन्फा कार्यालय सञ्चालन, पत्राचार र नियमित प्रशासनिक गतिविधि अघि बढाउन आवश्यक अधिकार प्रदान गरिएको छ ।

त्यस्तै, स्थगित एन्फा शनिबारे प्रशिक्षण कार्यक्रम पुनः सञ्चालन गर्ने, एन्फाद्वारा सञ्चालित एकेडेमीहरूको अवस्था र सञ्चालनका लागि आवश्यक बजेट तथा कार्यक्रमबारे सचिवालयमार्फत प्रतिवेदन पेस गर्न निर्देशन दिने निर्णय बैठकले गरेको छ । संघको नियमित कामका लागि आवश्यक सामग्री फिर्ता गर्न सम्बन्धित निकायमा पत्राचार गर्ने र दसौँ राष्ट्रिय खेल महोत्सवमा फुटबलतर्फका प्राविधिक विषयमा समन्वय गर्ने निर्णय पनि भएको छ ।

बैठकले फिफा यू–१५ फेस्टिभलमा सहभागी खेलाडी र प्रशिक्षकलाई जनही ५० हजार तथा अफिसियललाई जनही ३० हजार रुपैयाँ नगद पुरस्कार दिने निर्णयसमेत गरेको छ ।