
काठमाडौं । सिन्धुलीमा सामान्य घरायसी विवादका क्रममा ढुंगाको लोहोरोले टाउकोमा प्रहार गरी आफ्नै श्रीमतीको हत्या गरेको अभियोगमा एक व्यक्ति पक्राउ परेका छन्।
पक्राउ पर्नेमा कमलामाई नगरपालिका–१० डाँडाटोलका ४१ वर्षीय मनोज कार्की रहेका छन्। उनले मंसिर १ गते राति १ बजेतिर (मंगलबार बिहानका राति) सामान्य विवादका क्रममा ३९ वर्षीया श्रीमती सानुकुमारी कार्कीको टाउकोमा ढुंगाको लोहोरो प्रहार गरेको प्रारम्भिक अनुसन्धानबाट खुलेको प्रहरीले जनाएको छ । लोहोरोको प्रहारबाट गम्भीर घाइते भएकी सानुकुमारीको घटनास्थलमै मृत्यु भएको प्रहरीले जनाएको छ ।
घटनाबारे राति करिब १ः१५ बजेतिर जानकारी प्राप्त हुनासाथ इलाका प्रहरी कार्यालय भिमान र जिल्ला प्रहरी कार्यालय सिन्धुलीबाट प्रहरी टोली घटनास्थल पुगेको थियो। प्रहरीले घटनामा संलग्न मनोजलाई नियन्त्रणमा लिएको छ।
घटनाका सम्बन्धमा थप अनुसन्धान भइरहेको प्रहरीले जनाएको छ।

























