
काठमाडौं । प्रधानमन्त्री बालेन्द्र (बालेन) शाहले आसन्न भारत भ्रमणका विषयमा राष्ट्रिय स्वतन्त्र पार्टी (रास्वपा) का सभापति रवि लामिछानेसँग छलफल गरेका छन् ।
सिंहदरबारस्थित प्रधानमन्त्री तथा मन्त्रिपरिषद्को कार्यालयमा शुक्रबार दिउँसो २ बजेदेखि ५ बजेसम्म भएको भेटमा प्रधानमन्त्रीको भारत भ्रमण र त्यहाँ भारतीय नेतृत्वसँग उठाउन सकिने विषयबारे छलफल भएको बताइएको छ ।
भेटमा प्रधानमन्त्री शाहले आफ्नो भ्रमणबारे लामिछानेलाई जानकारी गराउँदै भारतीय नेताहरूसँगको भेटमा उठाउनुपर्ने महत्वपूर्ण विषयमा सुझाव मागेका थिए । यसअघि आफूले गरेको भारत भ्रमणको अनुभवका आधारमा लामिछानेले सम्भावित छलफलका विषयबारे सुझाव दिएको बताइएको छ ।
प्रधानमन्त्री शाह आइतबार दिउँसो दुईदिने भारत भ्रमणमा जाने कार्यक्रम छ । उनी ३४ सदस्यीय सरकारी टोलीसहित भारत जान लागेका हुन् । निजी क्षेत्रका ५२ जना व्यवसायी प्रतिनिधि पनि छुट्टै टोलीका रूपमा भारत जानेछन् ।

























