महानगरद्वारा स्वास्थ्य संस्थाको अनुगमन

विराटनगर । विराटनगर महानगरपालिकाले स्वास्थ्य संस्थाहरुको अनुगमनलाई तीव्रता दिएको छ ।

महानगरकी उपमेयर शिल्पा निराला कार्की नेतृत्वको टोलीले विराटनगरका स्वास्थ्य संस्थाहरुको अनुगमन गरेको हो । अस्पतालहरुले प्रवाह गर्ने सेवा सुविधाका विषयमा जनस्तरबाट गुनासो आउन थालेपछि महानगरले अनुगमनलाई तीव्रता पारेको हो ।

उपमेयर कार्कीको नेतृत्वमा सामाजिक विकास समितिका संयोजक काजीबहादुर बस्नेत, कोशी अस्पतालका प्रतिनिधि रामनारायण यादव, स्वास्थ्य महाशाखा संयोजक डाक्टर दिलीपकुमार यादव, स्वास्थ्य अधिकृत रमेश कार्कीलगायतको टोलीले बुधबार सिटी अस्पतालको अनुगमन गरेको छ ।

अस्पतालको अनुगमन गरी सुधार गर्नुपर्ने पक्षका विषयमा निर्देशनसमेत दिएको थियो । टोलीले अस्पतालमा भर्ना भएका बिरामीहरुलाई सेवा सुविधाका विषयमा सोधपुछ गरेको थियो । त्यस्तै, टोलीले सरसफाइ, ल्याब व्यवस्थापन, एक्स–रे सेवाको गुणस्तर, स्टोर व्यवस्थापनलगायतको प्रत्यक्ष अनुगमन गरी आवश्यक सुझाव दिएको स्वास्थ्य महाशाखाका संयोजक यादवले जानकारी दिए ।

जनताको स्वास्थ्यमाथि खेलवाड भइरहेको भन्ने जनगुनासो आएपछि अनुगमनलाई तीव्रता दिइएको उपमेयर कार्कीले बताइन् । स्वास्थ्य क्षेत्रप्रति महानगर गम्भीर रहेको बताउँदै उपमेयर कार्कीले स्वास्थ्य संस्था र अस्पतालहरुको अनुगमनलाई थप व्यापक बनाउँदै लगिने उल्लेख गरिन् ।

उनले दर्ता नगरी अस्पताल सञ्चालन नगर्न, समयमै नवीकरण गर्न तथा तोकिएका मापदण्ड पालना गर्न आग्रहसमेत गरेकी छन् ।