
विराटनगर । कोशी प्रदेशका पूर्वमुख्यमन्त्री केदार कार्कीले अनशन बस्ने तयारी गरेका छन् । यसअघि नै उनले अनशन बस्ने घोषणा गरेका थिए ।
कार्कीको मुख्य माग १० वर्षमुनिका बालबालिकाको निःशुल्क उपचार हो । १ साताअघि संसदबाट उनले आफ्नो कार्यकालमा सुरु भएको १० वर्षमुनिका बालबालिकाको निःशुल्क उपचार पुनः सुरु गर्न माग गरेका थिए ।
माग सम्बोधन नभएको भन्दै आइतबार मुख्यमन्त्री हिक्मतकुमार कार्कीलाई स्मरणपत्र बुझाएर उनले ४८ घण्टापछि अनशन बस्ने घोषणा गरेका हुन् । कार्की नेतृत्वमा हुँदा सरकारले प्रदेशका ठूला निजी अस्पतालमा १० वर्ष मुनीका बालबालिकाको उपचार निःशुल्क गर्ने घोषणा गरेका थिए ।
हिक्मतकुमार कार्कीको नेतृत्वमा बनेको नयाँ सरकारले प्रदेशको स्रोतले धान्न नसक्ने भन्दै प्रदेश सरकार मातहतका अस्पतालमा मात्रै निःशुल्क उपचार गर्ने नियम बनाएको थियो । ‘विशेषज्ञ सेवा नै नभएको अस्पतालहरुमा निःशुल्क गर्नुको अर्थ छैन । मेरो पालामा पनि निःशुल्क थियो । विशेषज्ञ सेवा प्रदेशले निःशुल्क दिनुपर्छ,’ केदार कार्कीले भने ।
उनले मुख्यमन्त्रीसँग ९ बुँदे माग अघि सारेका छन् । मागको पहिलो नम्बरमा प्रदेशमा १० वर्षमुनिका बालबालिकाका लागि विशिष्टिकृत सेवासहित निःशुल्क उपचार कार्यक्रमको निरन्तरताको माग गरिएको छ ।
बजेटमा २५ लाखभन्दा कमका आयोजना नराख्ने, शैलेजा आचार्य हृदयरोग उपचार केन्द्र सञ्चालन गर्नुपर्ने, महिला स्ययंसेविकालाई प्रोत्साहन भत्ता दिनुपर्नेलगायतका माग केदार कार्कीले राखेका छन् ।
माग सम्बोधन नभए प्रदेशसभा सचिवालयमा धर्ना बस्ने र अनशन सुरु गर्ने उनले बताए ।


























